കണ്ണൂര്‍: പഴശ്ശി കനാല്‍ പദ്ധതി പരിസരം മാലിന്യമുക്തമാക്കുന്നതിന് 2016-17 സാമ്പത്തിക വര്‍ഷത്തെ വികസന പദ്ധതിയുടെ ഭാഗമായി പ്ലാസ്റ്റിക് മാലിന്യ സംസ്‌കരണ യൂനിറ്റ് പ്രവര്‍ത്തനക്ഷമമാക്കാന്‍ കണ്ണൂര്‍ നഗരസഭ നടപടി സ്വീകരിക്കണമെന്ന് സംസ്ഥാന മനുഷ്യാവകാശ കമ്മിഷന്‍.
 പുഴാതി ഗ്രാമപഞ്ചായത്ത് 2013ല്‍ സ്ഥാപിച്ച പ്ലാസ്റ്റിക് റീസൈക്ലിങ് യൂനിറ്റ് പ്രവര്‍ത്തനക്ഷമമാക്കുന്നതിന് അടിയന്തിര നടപടികള്‍ സ്വീകരിക്കണമെന്നും കമ്മിഷന്‍ ആക്ടിങ് ചെയര്‍പേഴ്‌സണ്‍ പി. മോഹന്‍ദാസ് ഉത്തരവിട്ടു.
 നിര്‍ദേശങ്ങളില്‍ മേല്‍ നടപടി സ്വീകരിച്ചശേഷം കണ്ണൂര്‍ നഗരസഭ സെക്രട്ടറി രണ്ടു മാസത്തിനകം നടപടി റിപ്പോര്‍ട്ട് ഫയല്‍ ചെയ്യണം. പഴശ്ശി കനാല്‍ പ്രദേശത്ത് അറവുമാലിന്യങ്ങളും വീടുകളില്‍നിന്നുള്ള മാലിന്യങ്ങളും നിക്ഷേപിക്കുന്നതുകാരണം സമാധാന ജീവിതം തടസപ്പെടുന്നു എന്നാരോപിച്ച് കക്കാട് സ്വദേശി വി. അന്‍വര്‍ സമര്‍പ്പിച്ച പരാതിയിലാണ് നടപടി.
കനാലുകളുടെ ഉടമസ്ഥാവകാശം ഇറിഗേഷന്‍ വകുപ്പിനാണ്.
മാലിന്യം കാരണം അലഞ്ഞുതിരിയുന്ന തെരുവു പട്ടികളെ നിയന്ത്രിക്കുന്നതിന് കണ്ണൂര്‍ ജില്ലാ പഞ്ചായത്തുമായി ചേര്‍ന്ന് പദ്ധതി തയാറാക്കിയിട്ടുണ്ടെന്നും നഗരസഭ അറിയിച്ചു.