തലശ്ശേരി: തലശ്ശേരി നഗരമധ്യത്തിലെ വീട്ടുമുറ്റത്ത് കളിച്ചുകൊണ്ടിരിക്കുകയായിരുന്ന ഒരു വയസുകാരനെ തട്ടിക്കൊണ്ടു പോകാന്‍ ശ്രമം. തലശ്ശേരി കായ്യത്ത് റോഡിലെ സീനത്ത് മഹലില്‍ അഫ്‌സീനയുടെ മകന്‍ യാസിനെ തട്ടിക്കൊണ്ടു പോകാനുള്ള ശ്രമം സഹോദരനായ നാലു വയസുകാരന്റെ അവസരോചിത ഇടപെടലിലൂടെ ഇല്ലാതായി. ഓടിക്കൂടിയ നാട്ടുകാര്‍ കര്‍ണാടക സ്വദേശിനിയായ അറുപതുകാരിയെ പിടികൂടി പൊലിസില്‍ ഏല്‍പ്പിച്ചു.
ബംഗളുരു എളവങ്ക സ്വദേശിനി രാമങ്കയാണ് പിടിയിലായത്. ഇന്നലെ ഉച്ചക്ക് രണ്ടരയോടെയാണ് സംഭവം. കായ്യത്ത് റോഡിലെ ധാന്യങ്ങള്‍ പൊടിക്കുന്ന മില്ലിന് സമീപത്തെ വീട്ടു മുറ്റത്ത് കളിക്കുകയായിരുന്ന യാസിനെ മാന്യമായ വേഷം ധരിച്ചെത്തിയ സത്രീ എടുത്ത് കടന്നു കളയുകയായിരുന്നു. യാസിന്റെ സഹോദരന്‍ ബഹളം വയ്ക്കുകയും ഇതുകേട്ട് വീട്ടുകാര്‍ നോക്കുമ്പോള്‍ കുട്ടിയെയും കൊണ്ട് അപരിചിതയായ സ്ത്രീയെ ഗേറ്റിന്   പുറത്ത് കാണുകയുമായിരുന്നു. വീട്ടുകാരും ബഹളം വച്ചതിനെ തുടര്‍ന്ന് നാട്ടുകാര്‍ ഓടിക്കൂടിയപ്പോള്‍ കുഞ്ഞിനെ ഉപേക്ഷിച്ച് സ്ത്രീ കടന്നുകളയാന്‍ ശ്രമിച്ചെങ്കിലും നാട്ടുകാര്‍ പിടികൂടി  തലശ്ശേരി പൊലിസില്‍ ഏല്‍പ്പിക്കുകയായിരുന്നു.
പ്രതിയില്‍ നിന്ന് രണ്ടായിരത്തിലേറെ രൂപ അടങ്ങിയ തുണി സഞ്ചിയും പുകയിലയും നൂറും മറ്റും കണ്ടെടുത്തു. നേരത്തെയും ഇത്തരം തട്ടിക്കൊണ്ട് പോകല്‍ സംഭവങ്ങളില്‍ പ്രതിയാണോ രാമങ്കയെന്ന് പൊലിസ് അന്വേഷിക്കുന്നുണ്ട്.