നിലമ്പൂര്‍: കര്‍ണാടകയില്‍ നിന്നും പച്ചക്കറി ഇറക്കുമതി ചെയ്യുന്ന വാഹനങ്ങളില്‍ ജില്ലയിലേക്ക് നിരോധിത ലഹരിവസ്തുക്കളുടെ ഇറക്കുമതി നിര്‍ബാധം തുടരുന്നു. മൈസൂര്‍, ഗുണ്ടല്‍പേട്ട എന്നിവിടങ്ങളില്‍ നിന്നും നാടുകാണി ചുരം വഴിയാണ് ഹാന്‍സ്, പാന്‍പരാഗ് പോലുള്ള നിരോധിത ലഹരിവസ്തുക്കളുടെ ഇറക്കുമതി വ്യാപകമായിട്ടുള്ളത്. തക്കാളി, സവാള തുടങ്ങിയ പച്ചക്കറികളുടെ മറപറ്റിയാണ് കൂടുതലും ഇറക്കുമതിയുള്ളത്.
പച്ചക്കറികള്‍ക്ക് ഇറക്കുമതി തീരുവ ഇല്ലാത്തതിനാല്‍ ഇത്തരം ചരക്ക് വാഹനങ്ങള്‍ ജില്ലയുടെ അതിര്‍ത്തി ചെക്ക്‌പോസ്റ്റുകളില്‍ കാര്യമായ പരിശോധന നടത്താറില്ല. ഈ സാഹചര്യം മുതലെടുത്താണ് ലഹരി വസ്തുകളുടെ ഇറക്കുമതി വ്യാപകമായിട്ടുള്ളത്. മലപ്പുറം, പെരിന്തല്‍മണ്ണ, തിരൂര്‍, തിരൂര്‍ക്കാട് എന്നിവിടങ്ങളിലെ രഹസ്യ ഗോഡൗണുകളിലാണ് ഇറക്കുമതി ചെയ്യുന്ന ലഹരിവസ്തുക്കള്‍ സൂക്ഷിക്കുന്നത്.
ഇവിടെ നിന്നുമാണ് ജില്ലയുടെ വിവിധ ഭാഗങ്ങളിലേക്ക് ഓട്ടോറിക്ഷ, മിനി ഗുഡ്‌സ്, ഓംനി എന്നിവയില്‍ എത്തിക്കുന്നത്. ചില സമയങ്ങളില്‍ സ്‌കൂട്ടറുകളിലും ചില്ലറ വില്‍പ്പന കേന്ദ്രങ്ങളിലേക്ക് ഇവ എത്തിക്കുന്നുണ്ട്. രാത്രിസമയങ്ങളിലാണ് നാടുകാണി ചുരം വഴിയുള്ള ഇറക്കുമതി. ജീപ്പ് ഗുഡ്‌സിലും പ്ലാസ്റ്റിക് വസ്തുകള്‍ ഇറക്കുമതി ചെയ്യുന്ന ലോറികളിലുമാണ് ഇറക്കുമതി കൂടുതലും നടക്കുന്നത്. വഴിയില്‍ പൊലിസിന്റെ സാന്നിധ്യമോ, വാഹനപരിശോധനയോ, ചെക്ക്‌പോസ്റ്റുകളില്‍ സ്‌പെഷ്യല്‍ പരിശോധനയോ ഉണ്ടെങ്കില്‍ മൊബൈല്‍ ഫോണ്‍ വഴി വിവരം നല്‍കാന്‍ അതിര്‍ത്തി ചെക്ക്‌പോസ്റ്റുകളിലും പരിസരങ്ങളിലും ഏജന്റുമാര്‍ സാന്നിധ്യം ഉറപ്പിച്ചിട്ടുണ്ടാവും.
രഹസ്യവിവരം ലഭിച്ചാലും പൊലിസിന്റെ ആസൂത്രിതമായ നീക്കത്തിലൂടെയല്ലാതെയുള്ള റെയ്ഡുകള്‍ പലപ്പോഴും ലക്ഷ്യം കാണാതെ പോവുകയാണ് ചെയ്യുന്നത്. രഹസ്യവിവരം ലഭിക്കുന്ന സമയം പൊലിസ് വാഹനത്തില്‍ ചീറിപാഞ്ഞാണ് റെയ്ഡിന് പുറപ്പെടുന്നത്. ഈ വിവരം ഏജന്റുമാര്‍ വഴി ഇറക്കുമതി വാഹനങ്ങളിലുള്ളവര്‍ക്ക് അപ്പോള്‍ തന്നെ ലഭിച്ചിരിക്കും. ഇതോടെ വാഹനങ്ങള്‍ തിരിച്ചുവിടുകയോ, ഊട് വഴിയിലോ മറ്റൊ നിര്‍ത്തിയിടുകയോ ചെയ്ത് പൊലിസിന്റെ കണ്ണ് വെട്ടിക്കുന്നു.
ഗുഡല്ലൂര്‍ നാടുകാണി, താളൂര്‍ നാടുകാണി വഴിയുമാണ് മലപ്പുറം ജില്ലയിലേക്കുള്ള ഇറക്കുമതി. കോയമ്പത്തൂര്‍, അട്ടപ്പാടി, ബത്തേരി, കല്‍പ്പറ്റ വഴി വയനാട്ടിലേക്കും ഇറക്കുമതിയുണ്ട്. 30 ചെറിയ പാക്കറ്റുകളടങ്ങുന്ന വലിയ പാക്കറ്റിന് കര്‍ണാടകയില്‍ 150 രൂപയാണ് വില. ഇവിടെ ഏജന്റുമാര്‍ പാക്കറ്റ് ഒന്നിന് 300 രൂപക്കാണ് വില്‍പ്പന. കടകളില്‍ ചില്ലറ വില്‍പ്പന പാക്കറ്റ് ഒന്നിന് 650 മുതല്‍ 750 വരെ വില്‍പ്പന നടത്തുന്നു.
കൊള്ളലാഭം ലഭിക്കുമെന്നതിനാല്‍ സ്‌കൂള്‍ പരിസരങ്ങളില്‍ ഉള്‍പ്പടെയുള്ള പെട്ടിക്കടകളില്‍ നിര്‍ലോഭമായാണ് ഇവയുടെ വില്‍പ്പന. അടുത്തിടെ കോടതി നിര്‍ദേശ പ്രകാരം ഇത്തരം കുറ്റകൃത്യങ്ങള്‍ക്ക് തടവ് ശിക്ഷവരെ ഉറപ്പാക്കിയിട്ടുണ്ടെങ്കിലും ഇപ്പോഴും ജാമ്യം കിട്ടുന്നതും പിഴയീടാക്കുന്നതുമായ നിസാര വകുപ്പുകളാണ് പൊലിസ് ചുമത്തുന്നത്.