തിരുവനന്തപുരം: ദേശീയഅന്തര്‍ദേശീയ വേദികളില്‍ കേരളീയ തനതു കലകളുടെയും സംസ്‌കാരത്തിന്റെയും പ്രതിപുരുഷനായിരുന്നു നാടകാചാര്യന്‍ കാവാലം നാരായണപ്പണിക്കരെന്ന് മുന്‍ ഡെപ്യൂട്ടി സ്പീക്കറും സംസ്‌കാരസാഹിതി ചെയര്‍മാനുമായ പാലോട് രവി അനുസ്മരിച്ചു. അദ്ദേഹത്തിന്റെ തിരോധാനം സാംസ്‌കാരികകേരളത്തിന് അപരിഹാര്യമായ നഷ്ടമാണെന്ന് അദ്ദേഹം അനുശോചനസന്ദേശത്തില്‍ പറഞ്ഞു.
നഷ്ടമായത്
അതുല്യപ്രതിഭയെ:
ഉഴവൂര്‍
തിരുവനന്തപുരം: കാവാലം നാരായണപ്പണിക്കരുടെ നിര്യാണത്തില്‍ എന്‍.സി.പി. സംസ്ഥാന പ്രസിഡന്റ് ഉഴവൂര്‍ വിജയന്‍ അനുശോചിച്ചു. നാടകരംഗത്തും കവിതയിലും ഗാനരചനാരംഗത്തും ഒരേപോലെ വ്യക്തിമുദ്ര പതിപ്പിച്ച അതുല്യപ്രതിഭയായിരുന്നു അദ്ദേഹമെന്നും കാവാലത്തിന്റെ നിര്യാണം കേരളത്തിലെ കലാ സാംസ്‌കാരിക രംഗത്തിന് തീരാനഷ്ടമാണെന്നും അനുശോചന സന്ദേശത്തില്‍ പറഞ്ഞു.
ഗവര്‍ണര്‍
അനുശോചിച്ചു
തിരുവനന്തപുരം: മലയാളി ജീവിതത്തിന്റെ തനത് നിഷ്‌കളങ്കതയെയും സൗരഭ്യത്തെയും തിളക്കത്തെയും കലാസൃഷ്ടികളില്‍ എന്നും നിലനിര്‍ത്തിയ അതുല്യപ്രതിഭയായ കാവാലം നാരായണപ്പണിക്കരെ കേരളം ഒരിക്കലും മറക്കില്ലെന്ന് ഗവര്‍ണര്‍ ജസ്റ്റിസ് പി സദാശിവം തന്റെ അനുശോചനസന്ദേശത്തില്‍ പറഞ്ഞു. ക്ലാസ്സിക്കല്‍ കലാസങ്കല്‍പ്പങ്ങളെ ജനകീയ ഭാഷയിലൂടെയും ബിംബങ്ങളിലൂടെയും അവതരിപ്പിച്ച് നാടകരംഗത്തിന് പുതിയ ആവിഷ്‌കാരശൈലി നല്‍കിയ കാവാലത്തിന് കലാരംഗത്തെയും അക്കദമിലോകത്തെയും ഒരുപോലെ പ്രചോദിപ്പിക്കാനായെന്നും ഗവര്‍ണര്‍ പറഞ്ഞു.