മട്ടാഞ്ചേരി: നിയന്ത്രണം വിട്ട കാര്‍ ഫുട്പാത്തിലേക്ക് ഇടിച്ചു കയറി സൈക്കിള്‍ കടയും വൈദ്യുതി പോസ്റ്റും തകര്‍ന്നു. ശനിയാഴ്ച രാത്രി പതിനൊന്ന് മണിയോടെയാണ് സംഭവം. അമിത വേഗത്തില്‍ വന്ന കാര്‍ ഉയര്‍ത്തി കെട്ടിയ ഫുട്പാത്തിലേക്ക് പാഞ്ഞ് കയറി സൈക്കിള്‍ കടയും വൈദ്യുതി പോസ്റ്റും തകര്‍ത്തു.
കരുവേലിപടി കടേപറമ്പില്‍ തെക്കേ പള്ളിക്കല്‍ അലി അനസിന്റെതാണ് കട. വര്‍ഷങ്ങളായി ചെല്ലാനം സ്വദേശി ഹര്‍ഷന്‍ കടയില്‍ സൈക്കിള്‍ റിപ്പയറിങ് നടത്തി വരികയാണ്.
കടക്ക് സമീപത്തെ അഷറഫിന്റെ വീടിന്റെ ഭിത്തിക്കും ചെറിയ കേടുപാടുകള്‍ സംഭവിച്ചിട്ടുണ്ട്. കാര്‍ ഇടിച്ചു നിന്നതോടെ വീട്ടുകാര്‍ക്ക് പുറത്തേക്ക് വാതില്‍ തുറക്കാനാവാത്ത അവസ്ഥയായി. പിന്നീട് നാട്ടുകാര്‍ ചേര്‍ന്ന് കാര്‍ വാതില്‍ തുറക്കാന്‍ പാകത്തില്‍ തള്ളിമാറ്റിയതിനു ശേഷമാണ് അഷറഫിന് പുറത്തിറങ്ങാനായത്. സംഭവത്തില്‍ ട്രാഫിക് പൊലിസ് കേസെടുത്തിട്ടുണ്ട്.