മണ്ണാര്‍ക്കാട്: ആര്യമ്പാവ് നായാടിപ്പാറക്ക് സമീപം 12 വയസുകാരനെ തട്ടികൊണ്ടു പോവാന്‍ ശ്രമമെന്ന് പരാതി. ഞായറാഴ്ച വൈകുന്നേരം 6.30 ഓടെയാണ് സംഭവം. കളി കഴിഞ്ഞ് അയല്‍ക്കാരനായ കൂട്ടുകാരനെ സൈക്കിളില്‍ വീട്ടിലാക്കി സ്വന്തം വീട്ടിലേക്ക് മടങ്ങുമ്പോഴാണ് സംഭവം.
സൈക്കിളിന് കുറുകെ ചുവപ്പ് കാര്‍ നിര്‍ത്തി മുഖംമൂടി അണിഞ്ഞ ഒരാളും താടിയുള്ള മറ്റൊരാളും കാറില്‍ നിന്നിറങ്ങി പിടിക്കാന്‍ ശ്രമിക്കുകയായിരുന്നുവെത്രെ. കുതറി സൈക്കിളില്‍ പോയ ബാലനെ വീണ്ടും കാറില്‍ പിന്തുടര്‍ന്നെന്നും, എന്നാല്‍ റോഡിലുണ്ടായിരുന്ന ഗതാഗത കുരുക്കില്‍ പെട്ട് കാര്‍ മുന്നോട്ട് എടുക്കാന്‍ കഴിയാത്തതാണ് കുട്ടിക്ക് രക്ഷയായതെന്നാണ് രക്ഷിതാക്കള്‍ പറയുന്നത്. പേടിച്ച് സൈക്കിളില്‍ പോയ ബാലന്‍ മാതാവിന്റെ വീടായ കാവുണ്ടയില്‍ അപയം തേടുകയായിരുന്നു. രാത്രി പത്ത് മണിയോടെ ബന്ധുക്കള്‍ സംഭവത്തില്‍ പരാതി കൊടുക്കാന്‍ നാട്ടുകല്‍ പൊലിസ് സ്റ്റേഷനിലെത്തി.