പത്തനാപുരം(കൊല്ലം): നഴ്‌സിങ് വിദ്യാര്‍ഥിനി ആത്മഹത്യയ്ക്ക് ശ്രമിച്ച സംഭവത്തില്‍ മൂന്നു അധ്യാപികമാര്‍ക്ക് സസ്‌പെന്‍ഷന്‍. പത്തനാപുരം പട്ടാഴി വടക്കേക്കര സ്വദേശിനിയായ പെണ്‍കുട്ടിയുടെ മാതാപിതാക്കള്‍ നല്‍കിയ പരാതിയില്‍ അധ്യാപികമാര്‍ക്കും കോളജ് പ്രിന്‍സിപ്പലിനും എതിരേ പത്തനാപുരം പൊലിസ് കേസെടുത്ത് അന്വേഷണവും ആരംഭിച്ചു. ഇതിനിടെയാണ് അടൂര്‍ ചായലോട് സ്വകാര്യമെഡിക്കല്‍ കോളജിലെ അധ്യാപകരായ രാജി, ശാലിനി, സീതാ ലക്ഷ്മി എന്നിവരെ മാനേജ്‌മെന്റെ് സസ്‌പെന്‍ഡ് ചെയ്തത്.
മൂന്നാംവര്‍ഷ ബി.എസ്.സി നഴ്‌സിങ് വിദ്യാര്‍ഥിനിയായിരുന്ന ഇരുപത്തിയൊന്നുകാരിയാണ് കഴിഞ്ഞ ദിവസം അമിതയായി ഗുളികകള്‍ കഴിച്ച് ആത്മഹത്യയ്ക്ക് ശ്രമിച്ചത്. കോളജ് അധികൃതരുടെ മാനസികപീഡനത്തെ തുടര്‍ന്നാണ് പെണ്‍കുട്ടി ആത്മഹത്യയ്ക്ക് ശ്രമിച്ചതെന്നാണ് ആരോപണം. ബന്ധുക്കളുടെ പരാതിയുടെയും പെണ്‍കുട്ടിയുടെ മൊഴിയുടെയും അടിസ്ഥാനത്തില്‍ പത്തനാപുരം കോളജ് പ്രിന്‍സിപ്പല്‍ ശ്രീജാ രവിചന്ദ്രന്‍, അധ്യാപികയായ രാജി എന്നിവര്‍ക്കെതിരേയാണ് പൊലിസ് കേസെടുത്തത്. സംഭവത്തെ തുടര്‍ന്ന് യൂത്ത് കോണ്‍ഗ്രസ്, എസ്.എഫ് ഐ, ഡി.വൈ.എഫ്.ഐ സംഘടനകള്‍ കോളജിലേയ്ക്ക് മാര്‍ച്ച് നടത്തുകയും ചെയര്‍മാനെ തടഞ്ഞുവയ്ക്കുകയും ചെയ്തു.