കൊല്ലം: അലംഭാവം കാണിക്കുന്ന ഉദ്യോഗസ്ഥരെ ജാഗ്രതയുള്ളവരാക്കുക എന്നത് മനുഷ്യാവകാശ കമ്മിഷന്റെ കടമയാണെന്ന് സംസ്ഥാന മനുഷ്യാവകാശ കമ്മിഷന്‍ ആക്ടിങ് ചെയര്‍പേഴ്‌സണ്‍ പി. മോഹന്‍ദാസ്.
പത്തനാപുരം ഗാന്ധിഭവനില്‍ സംസ്ഥാന മനിഷ്യവകാശ കമ്മിഷന്റെ സംസ്ഥാനതല സെമിനാര്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മനുഷ്യാവകാശകമ്മിഷന്‍ നല്ല ഭരണത്തിന്റെ ഭാഗമാണ്. കമ്മിഷന്റെ നടപടികള്‍ സര്‍ക്കാരിനെതിരല്ല. സര്‍ക്കാര്‍ നടപ്പിലാക്കിയ നിയമങ്ങള്‍ ജനങ്ങളിലെത്തിക്കാന്‍ സഹായിക്കുകയും ഭാഗമാവുകയുമാണ് കമ്മിഷന്‍ ചെയ്യുന്നതെന്നും അദ്ദേഹം പറഞ്ഞു.
സംസ്ഥാന ബാലാവകാശ കമ്മിഷന്‍ മെംബര്‍ സി.ജെ ആന്റണി അധ്യക്ഷനായി. ഗാന്ധിഭവന്‍ സെക്രട്ടറി ഡോ. പുനലൂര്‍ സോമരാജന്‍, ജില്ലാ സബ് ജഡ്ജ് ആര്‍. സുധാകാന്ത്, സി.ഡബ്ല്യു.സി ചെയര്‍പേഴ്‌സണ്‍ പ്രൊഫ. ടി കോമള കുമാരി, സി.ഡബ്ല്യു.സി അംഗം പി.എസ്.എം ബഷീര്‍, മഹാത്മാഗാന്ധി യൂനിവേഴ്‌സിറ്റി ജേര്‍ണലിസം വിഭാഗം ഡയറക്ടര്‍ പ്രൊഫ. മാടവന ബാലകൃഷ്ണപിള്ള, എസ്. സുവര്‍ണ്ണ കുമാര്‍, കെ. ധര്‍മ്മരാജന്‍, നൗഫല്‍ ബാഖവി തലനാട്, കൊട്ടിയം എന്‍. അജിത്കുമാര്‍, ബെന്നിജോസഫ് ജനപക്ഷം, വിഷ്ണുദേവ്, കലാപ്രേമി ബഷീര്‍, ലൈല ദിവാകരന്‍, സിദ്ധിഖ് സജീവ്, ഷാജി മുംബൈ, അഡ്വക്കേറ്റ് സജീവ്, ജോര്‍ജ് കുളങ്ങര സംസാരിച്ചു.