കൊച്ചി: കേരളത്തില്‍ വിദ്യാര്‍ഥി സംഘടനാ പ്രവര്‍ത്തനങ്ങളെ എതിര്‍ക്കുന്ന കോളജുകളുടെ പട്ടിക തയാറാക്കി സമര്‍പ്പിക്കാന്‍ സ്വാശ്രയ വിദ്യാഭ്യാസ സ്ഥാപനങ്ങളുമായി ബന്ധപ്പെട്ട പ്രശ്‌നങ്ങളെ കുറിച്ചന്വേഷിക്കുന്ന റിട്ട. ജസ്റ്റിസ് കെ.കെ ദിനേശന്‍ അധ്യക്ഷനായ കമ്മിഷന്റെ നിര്‍ദേശം.
ഇന്നലെ എറണാകുളം ഗസ്റ്റ് ഹൗസില്‍ നടത്തിയ സിറ്റിങില്‍ ഹാജരായ വിദ്യാര്‍ഥി സംഘടനാ ഭാരവാഹികളോടാണ് കമ്മിഷന്‍ ഇക്കാര്യം ആവശ്യപ്പെട്ടത്.

കോളജുകളില്‍ വിദ്യാര്‍ഥികള്‍ക്ക് സംഘടനാ സ്വാതന്ത്ര്യം നിഷേധിക്കപ്പെടുന്നതായും ഡ്രസ് കോഡ്, ഇന്റേണല്‍ മാര്‍ക്ക് തുടങ്ങിയ വിഷയങ്ങള്‍ ചൂണ്ടിക്കാട്ടി വിദ്യാര്‍ഥികളെ മാനേജ്‌മെന്റുകള്‍ ഭീഷണിപ്പെടുത്തുന്നതായും വിദ്യാര്‍ഥി സംഘടനകള്‍ പരാതിപ്പെട്ടു.
സംസ്ഥാനത്തെ ഭൂരിഭാഗം കോളജുകളിലും വിദ്യാര്‍ഥികള്‍ക്ക് സംഘടനാ സ്വാതന്ത്ര്യം നിഷേധിക്കപ്പെടുന്നു. വിദ്യാര്‍ഥികളുടെ ആവശ്യങ്ങള്‍ അറിയുന്നതിനും അവകാശങ്ങള്‍ സംരക്ഷിക്കുന്നതിനും സ്വാശ്രയ കോളജുകളില്‍ സംഘടനാ രാഷ്ട്രീയം ആവശ്യമാണെന്നും വിവിധ വിദ്യാര്‍ഥി സംഘടനകളുടെ പ്രതിനിധികള്‍ പറഞ്ഞു.

അതേസമയം, വിദ്യാര്‍ഥികളുടെ പ്രശ്‌നങ്ങള്‍ അവര്‍ നേരിട്ടെത്തി പരാതി എഴുതി നല്‍കണമെന്നും കോളജുകളില്‍ നിന്ന് പഠനം പൂര്‍ത്തിയാക്കി പുറത്തു പോയവര്‍ക്കും കമ്മിഷനില്‍ പരാതി നല്‍കാമെന്നും കമ്മിഷന്‍ അധ്യക്ഷന്‍ പറഞ്ഞു. പരാതികള്‍ പരിശോധിച്ച ശേഷം വിവിധ കോളജ് മാനേജ്‌മെന്റുകളുടെ വിശദീകരണം ആരായും. അതിനുശേഷം സര്‍ക്കാരിലേക്ക് നിര്‍ദേശം സമര്‍പ്പിക്കും. പരാതികളും നിര്‍ദേശങ്ങളും ഇന്ന് രേഖാമൂലം സമര്‍പ്പിക്കുവാന്‍ കമ്മിഷന്‍ ആവശ്യപ്പെട്ടു. കമ്മിഷന്‍ അംഗങ്ങളായ ഡോ.കെ.കെ.എന്‍ കുറുപ്പ്, ഡോ.ആര്‍.വി.ജി മേനോന്‍ എന്നിവരും എസ്.എഫ്.ഐയെ പ്രതിനിധീകരിച്ച് സംസ്ഥാന കമ്മിറ്റിയംഗം എന്‍.പി ശ്രീനാഥ്, ടെക്‌നോസ് ജോയിന്റ് കണ്‍വീനര്‍ അഖില്‍ ഷാജി, എ.ബി.വി.പിയെ പ്രതിനിധീകരിച്ച് ശ്യാം രാജ് എന്നിവരും സിറ്റിങില്‍ പങ്കെടുത്തു.