ന്യൂഡല്‍ഹി: അന്ധ്രപ്രദേശ് സൂപ്പര്‍ ഫാസ്റ്റ് എക്‌സ്പ്രസിന്റെ നാല് കോച്ചുകള്‍ക്ക് തീപിടിച്ചു. ആളപായമില്ല. മധ്യപ്രദേശിലെ ഗ്വാളിയോറിനടുത്തുള്ള ബിര്‍ള നഗര്‍ റെയില്‍വേ സ്റ്റേഷന് സമീപമാണ് തീപിടിത്തമുണ്ടായത്. ഫയര്‍ എന്‍ജിനുകള്‍ ഉടന്‍ സ്ഥലത്തെത്തി തീയണച്ചു.
തീവണ്ടി നിര്‍ത്തുന്നതിന് മുന്‍പ് എടുത്തുചാടാന്‍ ശ്രമിച്ച ഏതാനും യാത്രക്കാര്‍ക്ക് നിസാര പരുക്കേറ്റിട്ടുണ്ട്. ഡല്‍ഹിയിലെ ഹസ്രത്ത് നിസാമുദ്ദീന്‍ സ്റ്റേഷനില്‍നിന്ന് ആന്ധ്രപ്രദേശിലെ വിശാഖപട്ടണത്തേക്ക് പോകുകയായിരുന്ന ട്രെയിനിനാണ് തീപിടിച്ചത്. വൈദ്യുതി ലൈന്‍ പൊട്ടിവീണതാകാം അപകട കാരണമെന്നാണ് കരുതുന്നത്. അപകടത്തെ തുടര്‍ന്ന് ഡല്‍ഹി-ഗ്വാളിയോര്‍ റൂട്ടിലെ ഗതാഗതം ഭാഗികമായി തടസപ്പെട്ടു. സംഭവത്തില്‍ റെയില്‍വേ അന്വേഷണമാരംഭിച്ചു.