എടത്വാ: നിയന്ത്രണം വിട്ട ഓട്ടോ വെള്ളക്കെട്ടില്‍ വീണു. മാതാപിതാക്കളോടൊപ്പം ഓട്ടോയിലുണ്ടായിരുന്ന പിഞ്ച് കുഞ്ഞ് ഉള്‍പ്പെടെയുള്ളവര്‍ അത്ഭുതകരമായി രക്ഷപെട്ടു.
തലവടി കവലശേരി പ്രമോദ്, പ്രിയ ദമ്പതികളുടെ ഒന്നര വയസുള്ള മകളാണ് അത്ഭുതകരമായി രക്ഷപെട്ടത്.
നീരേറ്റുപുറം പരൂപ്പറമ്പില്‍ കൃഷ്ണന്‍കുട്ടി ഓടിച്ചിരുന്ന ഓട്ടോയാണ് ഇന്നലെ ഉച്ചകഴിഞ്ഞ് 2.30 ഓടെ എടത്വാ-തകഴി സംസ്ഥാനപാതയില്‍ കോഴിമുക്ക് മില്‍മ ബുത്തിന് സമീപം വെള്ളക്കെട്ടിലേക്ക് മറിഞ്ഞത്.
ഓട്ടോയിലുണ്ടായിരുന്ന കുട്ടി വെള്ളക്കെട്ടില്‍ മുങ്ങിപ്പോയിരുന്നു.
അപകടം കണ്ട് ഓടിയെത്തിയ നാട്ടുകാരാണ് കുട്ടിയെ വെള്ളക്കെട്ടില്‍ നിന്ന് മുങ്ങിയെടുത്തത്. യാത്രക്കാരേയും ഡ്രൈവറേയും സമീപത്തെ സ്വകാര്യ ആശുപത്രിയില്‍ എത്തിച്ചു. പ്രമോദിനും കൃഷ്ണന്‍കുട്ടിക്കും നിസര പരിക്കുകള്‍ പറ്റിയിട്ടുണ്ട്. ഓട്ടോ പൂര്‍ണമായി തകര്‍ന്ന നിലയിലാണ്.