കാക്കനാട്:  നഗരസഭ പരിധിയില്‍ തെരുവുവിളക്കുകളുടെ അറ്റകുറ്റപ്പണിയുടേയും മറ്റും പേരില്‍ കരാറുകാരന്‍ കൈക്കലാക്കുന്നത് ലക്ഷകണക്കിനു രൂപ. കഴിഞ്ഞ വര്‍ഷം മുതല്‍ ഈ കരാറുകാരന് ഭരണ പ്രതിപക്ഷ കൗണ്‍സിലറുടെ കൂടി ഒത്താശയോടെ കരാര്‍ നല്‍കിയത് ടെന്‍ഡര്‍ പോലും ഇല്ലാതെയാണ്. 2013 -14 ല്‍ രണ്ട് മേഖലകളാക്കി തിരിച്ച് ഒന്‍പത് ലക്ഷം രൂപക്ക്  നഗരസഭ കരാര്‍ നല്‍കിയത് തുടര്‍ന്നുള്ള രണ്ട് വര്‍ഷം ഒറ്റയടിക്ക് കരാര്‍ തുക 45 ലക്ഷമാക്കി ഉയര്‍ത്തുകയായിരുന്നു. ക്രമക്കേട് നഗരസഭ ഓഡിറ്റിങ് ചൂണ്ടിക്കാട്ടിയ വര്‍ഷം ടെന്‍ഡര്‍ പോലും ഒഴിവാക്കി നിലവിലുള്ള കരാറു കാരന്‍ വഴിവിളക്കുകളുടെ അറ്റകുറ്റപ്പണികള്‍ സ്വന്തമാക്കുകയായിരുന്നു.
അഞ്ച് ലക്ഷം രൂപക്ക് മുകളില്‍ വരുന്ന എല്ലാവിധ പൊതുമരാമത്ത് ജോലികള്‍ക്കും ഇ ടെന്‍ഡര്‍ നിര്‍ബന്ധമാക്കിയിട്ടും കൗണ്‍സിലറുടെ ബിനാമിയായ കരാറുകാരന് നിയമം വഴിമാറി. നഗരസഭ കൗണ്‍സിലിന് ടെന്‍ഡര്‍ നടപടി ഒഴിവാക്കാന്‍ അധികാരമുണ്ടെന്നാണു നഗരസഭ അധികൃതരുടെ വാദം.
അതെസമയം തെരുവുവിളക്കുകളുടെ അറ്റകുറ്റപ്പണി, പരിപാലനത്തിന് കഴിഞ്ഞ രണ്ട് വര്‍ഷം മുമ്പ് വരെ ശരാശരി മതിപ്പ് ചെലവ് 15 മുതല്‍ 20 ലക്ഷം രൂപവരെയാണെന്ന് ഇതിന് മുന്‍പ് കരാറെടുത്തവര്‍ ചൂണ്ടിക്കാട്ടുന്നത്. ഒരു സോഡിയം വെപ്പര്‍ വഴിവിളക്കിന് ഒരു വര്‍ഷത്തെ അറ്റകുറ്റപ്പണിക്കും മറ്റും 940 രൂപ മുതല്‍ 980 രൂപവരെയാണ് ടെന്‍ഡറില്‍ കാണിച്ചിരുന്നത്. ടൂബിന് 450 രൂപയും യൂണിറ്റ് കണക്കാക്കി നിരക്ക് നിശ്ചയിച്ചിരിക്കുന്നതില്‍ പലപ്പോഴും പഴയത് ഘടിപ്പിച്ച് പുതിയതിന്റെ വില ഈടാക്കുകയാണ് പതിവ്. വന്‍കിട കോര്‍പ്പറേറ്റ് സ്ഥാപനങ്ങള്‍ ഇലക്ട്രോണിക് മാലിന്യമായി പുറന്തള്ളുന്നത് കുറഞ്ഞ നിരക്കില്‍ ലേലം ചെയ്‌തെടുത്താണ് നഗരസഭ പ്രദേശത്ത് പുതിയ ഇലക്ട്രോണിക് സാധനങ്ങളാണെന്ന വ്യാജേന ഫിറ്റ് ചെയ്യുന്നത് എന്നും ആക്ഷേപമുണ്ട്.
രണ്ട് വര്‍ഷം മുമ്പ് വരെ മാറ്റി സ്ഥാപിക്കുന്ന ഇലക്ട്രിക് സാധനങ്ങള്‍ക്ക് ഗ്യാരന്റി നഗരസഭ കരാറില്‍ നിര്‍ദേശിച്ചിരുന്നു. കൗണ്‍സിലറുടെ ബിനാമിയുടെ കാര്യത്തില്‍ ഗാരന്റി ബാധകമല്ല. ഡിവിഷനില്‍ 50 ട്യൂബ് മാറിയിട്ടുണ്ടെങ്കില്‍ കൗണ്‍സിലര്‍ നല്‍കുന്ന സാക്ഷ്യപത്രത്തിന്റെ അടിസ്ഥാനത്തില്‍ നഗരസഭ തുക അനുവദിക്കാറാണ് പതിവ് . ഡബിള്‍ ട്യൂബില്‍ ഒരെണ്ണം മാറിയാലും രണ്ടെണ്ണം മാറിയതായി രേഖയുണ്ടാക്കിയാണ് തട്ടിപ്പ് അരങ്ങേറുന്നത്. ടെന്‍ഡര്‍ ഒഴിവാക്കി നിലവിലുള്ള കാരാറുകാരന് വഴിവിളക്കുകളുടെ കരാര്‍ വീണ്ടും നല്‍കുന്നതിനെതിരെ ഇലക്ട്രിക് കോണ്‍ട്രാക്ടര്‍മാരുടെ സംഘടന രംഗത്തെത്തിയിട്ടുണ്ട്.