ഹരിപ്പാട്: സംസ്ഥാന ശാസ്ത്ര, ഗണിത ശാസ്ത്ര, സാമൂഹ്യ ശാസ്ത്ര പ്രവൃത്തി പരിചയമേളകളിലും, സംസ്ഥാന കലോത്സവത്തിലും മികവ് പുലര്‍ത്തിയ വിദ്യാര്‍ഥികളെയും ഇന്‍സ്‌പെയര്‍ അവാര്‍ഡ് നേടിയവരെയും പങ്കെടുപ്പിച്ച് ഹരിപ്പാട് ഉപജില്ലയുടെ ആഭിമുഖ്യത്തില്‍ 24ന് പ്രതിഭാസംഗമം നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു.
കേരളത്തില്‍ തന്നെ ആദ്യമായി നടക്കുന്ന ചടങ്ങില്‍ 65ഓളം പ്രതിഭകള്‍ പെങ്കടുക്കും. പ്രതിഭാ സംഗമം സംസ്ഥാന വിദ്യാഭ്യാസ മന്ത്രി പ്രൊഫ.സി രവീന്ദ്രനാഥ് ഉദ്ഘാടനം ചെയ്യും. പ്രതിപക്ഷ നേതാവ് രമേശ് ചെന്നിത്തല അദ്ധ്യക്ഷനാകും. ചലച്ചിത്ര സംവിധായകന്‍ കെ.മധു മുഖ്യപ്രഭാഷണം നടത്തും.
സംസ്ഥാനതലത്തില്‍ വിവിധ മേഖലകളില്‍ മികച്ച വിജയം നേടിയവര്‍ക്ക് സബ്ബ്ജില്ലയുടെ ഉപഹാരം നല്‍കും.
ചടങ്ങില്‍ എം.എസ്.സി ഫിസിക്‌സ് പരീക്ഷയില്‍ ഒന്നാം റാങ്ക് നേടിയ ഫാത്തിമ.ആര്‍ നെ ആദരിക്കും.
നഗരസഭാ ചെയര്‍പേഴ്‌സണ്‍ പ്രൊഫ.സുധാസുശീലന്‍, ബ്ലോക്ക് പഞ്ചായത്ത് പ്രസിഡന്റുമാരായ ബിജു കൊല്ലശ്ശേരി, ബിപിന്‍ സി.ബാബു, ജില്ലാ പഞ്ചായത്ത് പ്രതിപക്ഷ നേതാവ് ജോണ്‍ തോമസ്, ജില്ലാ വിദ്യാഭ്യാസ ഉപഡയറക്ടര്‍ വി.അശോകന്‍, ജില്ലാ വിദ്യാഭ്യാസ ഓഫീസര്‍ കെ.പുഷ്പകുമാരി, ബ്ലോക്ക് പ്രോഗ്രാം ഓഫിസര്‍ കെ.ഉദയകുമാര്‍ എന്നിവര്‍ പങ്കെടുക്കും. വാര്‍ത്താ സമ്മേളനത്തില്‍ കെ.വി ഷാജി, എം.രാജേന്ദ്രപ്രസാദ്, പ്രസാദ്, എസ്.നാഗദാസ് തുടങ്ങിയവര്‍ പങ്കെടുത്തു.