ഫറോക്ക്: പ്രയാസമനുഭവിക്കുന്ന സഹജീവികള്‍ക്ക് നല്‍കുന്ന സഹായ ഹസ്തവും ആതുര സേവനത്തിനുള്ള പ്രതിബന്ധതയുമാണ് ജീവിത വിജയത്തിന് നിദാനമെന്ന് എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് സയ്യിദ് ഹമീദ് അലി ശിഹാബ് തങ്ങള്‍ പ്രസ്താവിച്ചു.
നമുക്ക് ചുറ്റും വേദന തിന്നുന്ന ആലംബ ഹീനരെ കാണാതെ പോകുമ്പോള്‍ നമ്മുടെ വിശ്വാസം പൂര്‍ണമാവില്ലെന്ന് തങ്ങള്‍ അഭിപ്രായപ്പെട്ടു.
'ഖുര്‍ആന്‍ സുകൃതത്തിന്റെ വചനപ്പൊരുള്‍' എന്ന പ്രമേയത്തില്‍ പ്രമുഖ പണ്ഡിതനും വാഗ്മിയുമായ മുസ്തഫ ഹുദവി ആക്കോടിന്റെ പരിശുദ്ധ റമദാനിലെ ത്രിദിന ഖുര്‍ആന്‍ പ്രഭാഷണത്തിന്റെ സമാപന ദിവസത്തെ പരിപാടികള്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ആക്കോട് ഇസ്‌ലാമിക് സെന്ററിന്റെ പ്രചരണത്തിന്റെ ഭാഗമായി സൗഹൃദ ക്കൂട്ടായ്മയുടെ ആഭിമുഖ്യത്തിലാണ് പ്രഭാഷണം സംഘടിപ്പിച്ചത്. സ്വാഗതസംഘം ചെയര്‍മാന്‍ പി.സി അഹമ്മദ് കുട്ടി ഹാജി അധ്യക്ഷനായി.
പരിശുദ്ധ ഖുര്‍ആനിലെ 89ാം അദ്ധ്യായമായ സൂറത്ത് 'അല്‍ ഫജര്‍' ആസ്പദമാക്കി മുസ്തഫ ഹുദവി ആക്കോട് പ്രഭാഷണം നടത്തി. സമസ്ത കേരള ജംഇയ്യത്തുല്‍ ഉലമ കേന്ദ്ര മുശാവറ അംഗം സൂഫീ വര്യനായ വാവാട് കുഞ്ഞിക്കോയ മുസ്‌ലിയാര്‍ പ്രാര്‍ഥനക്ക് നേതൃത്വം നല്‍കി.
ആക്കോട് ഇസ്‌ലാമിക് സെന്ററിന് വേണ്ടി സ്വരൂപിച്ച തുക വാവാട് കുഞ്ഞിക്കോയ മുസ്‌ലിയാര്‍ ഹമീദ് അലി തങ്ങള്‍ക്ക് കൈമാറി.
മുഹമ്മദ് കക്കാട്, ബഷീര്‍ കരീറ്റി പറമ്പ്, വി. ശിഹാബ്, ഷംസീര്‍ പാണ്ടികശല, സിദ്ധീഖ് മുസ്‌ലിയാര്‍ വാവാട്, എയര്‍ലൈന്‍സ് അസീസ്, മുഹമ്മദ് സലീം അമ്പലം കണ്ടി, വി. മുഹമ്മദ് ഹസ്സന്‍, കെ.ടി ബീരാന്‍ കുട്ടി ഹാജി, കളത്തിങ്ങല്‍ അബ്ദുറഹിമാന്‍, കെ.കെനസീര്‍, പി. മുസ്തഫ സംസാരിച്ചു.
പി.വി.ഷാഹുല്‍ ഹമീദ് സ്വാഗതവും കെ.പി ശിഹാബുദ്ദീന്‍ നന്ദിയും പറഞ്ഞു.