തിരൂര്‍: കൂട്ടായി എം.എം.എം ഹയര്‍സെക്കന്‍ഡറി സ്‌കൂളിലെ പത്താം ക്ലാസ് വിദ്യാര്‍ഥിനിക്കായി വിദ്യാര്‍ഥികളും അധ്യാപകരും പി.ടി.എ ഭാരവാഹികളും നാട്ടുകാരും ചേര്‍ന്നൊരുക്കിയ സ്‌നേഹ വീട് നാളെ സമര്‍പ്പിക്കും.
ഉണ്യാല്‍ പുതിയകടപ്പുറത്ത് ജനകീയ കൂട്ടായ്മയില്‍ ആറര ലക്ഷം രൂപ ചെലവില്‍ പണിത സ്‌നേഹവീടിന്റെ താക്കോല്‍ദാനം നാളെ വൈകീട്ട് മൂന്നിന് സാഹിത്യകാരന്‍ ആലങ്കോട് ലീലാകൃഷ്ണന്‍ നിര്‍വഹിക്കും. സ്‌കൂളിലെ സഹപാഠികള്‍ സമാഹരിച്ച രണ്ടര ലക്ഷം രൂപയും അധ്യാപകരും പൊതുജനങ്ങളും സമാഹരിച്ച ബാക്കി തുകയും ചേര്‍ത്ത് ആറര ലക്ഷം രൂപ ചെലവിലാണ് ഒരു വര്‍ഷത്തിനുള്ളില്‍ സ്‌നേഹവീട് യാഥാര്‍ഥ്യമാക്കിയതെന്ന് സ്‌കൂള്‍ അധികൃതര്‍ വാര്‍ത്താസമ്മേളനത്തില്‍ പറഞ്ഞു. സാമ്പത്തികമായി പിന്നോക്കം നില്‍ക്കുന്ന വിദ്യാര്‍ഥിയെന്ന നിലയിലും പിതാവ് ഭിന്നശേഷിക്കാരനായ മത്സ്യത്തൊഴിലാളിയാണെന്നതും കണക്കിലെടുത്താണ് വീടൊരുക്കി നല്‍കാന്‍ തീരുമാനിച്ചതെന്ന് സ്‌കൂള്‍ പ്രധാനധ്യാപകന്‍ വി.വി സത്യന്‍, സ്റ്റാഫ് സെക്രട്ടറി ഇ.എം ഷാനവാസ്, അധ്യാപകനായ ടി മുഹമ്മദ്, കെ.എസ് രാജേന്ദ്രന്‍ നായര്‍, എന്‍.ജെ ജോസ്, സി ബിന്ദുലാല്‍ പറഞ്ഞു.