പൂക്കോട്ടുംപാടം: കിണര്‍ വൃത്തിയാക്കി കയറുന്നതിനിടെ കിണറില്‍ വിണ് യുവാവിന് പരുക്കേറ്റു. വാണിയമ്പലം മാട്ടക്കുളം മണ്ണില്‍തൊടിക സൈജല്‍ (32) നാണ് പരുക്കേറ്റത്. ചൂണ്ടിക്കല്‍ ഐശ്വര്യഭവനില്‍ കെ.കെ അനില്‍ കുമാറിന്റെ വീട്ടിലെ കിണര്‍ നന്നാക്കുന്നതിനിടെ രാവിലെ 11.30 ഓടെയായിരുന്നു അപകടം. 70 അടിയോളം താഴ്ചയുള്ള കിണറാണ്. നാട്ടുകാര്‍ വിവരമറിയിച്ചതിനെ തുടര്‍ന്ന് സ്‌റ്റേഷന്‍ ഓഫിസര്‍ എം. അബ്ദുല്‍ഗഫൂറിന്റെ നേതൃത്വത്തിലെത്തിയ നിലമ്പൂരില്‍ അഗ്‌നിശമന സേന സ്ഥലത്തെത്തി. ഫയര്‍മാന്‍ വി. സുധീഷ് കിണറ്റിലിറങ്ങി സ്‌ട്രെച്ചറും കയറുമുപയോഗിച് നാട്ടുകാരുടെ സഹായത്തോടെയാണ് രക്ഷാപ്രവര്‍ത്തനം നടത്തിയത്. ഉദ്ദ്യോഗസ്ഥരായ വി.പി നിഷാദ്, പി. ബാബുരാജ്, എസ്. രമേശ്, ടി.കെ അഖില്‍, ടി.കെ നിഷാന്ത്, കെ.പി അമീറുദ്ദീന്‍, കെ.പി അനൂപ്, സി.വൈ ജോസഫ്, നാട്ടുകാരായ പിലാക്കല്‍ ഫൈസല്‍, അയനിക്കാടന്‍ അനീസ് എന്നിവരും രക്ഷാപ്രവര്‍ത്തനത്തില്‍ പങ്കെടുത്തു. മുതുകിനും അരക്കും ഗുരുതരമായി പരുക്കേറ്റ സൈജലിനെ നിലമ്പൂര്‍ ജില്ലാ ആസ്പത്രിയില്‍ പ്രവേശിപ്പിച്ചു.