ലഹരി ഉപയോഗിക്കുന്നവരുടെ വിവരങ്ങള്‍ രഹസ്യമായി
9446882775, 9447243009 ല്‍ അറിയിക്കാം
മലപ്പുറം: ജില്ലയിലെ മുഴുവന്‍ സ്‌കൂളുകളും ലഹരി മുക്തമാക്കുന്നതിന് കര്‍മ പദ്ധതി. ലഹരിയില്‍ നിന്നും കുട്ടികളെ സംരക്ഷിക്കുന്നതിനായി ലഹരിയുടെ ഉറവിടം, വിവിധ കണ്ണികള്‍ എന്നിവരെക്കുറിച്ച് അറിവ് ലഭിക്കുന്നവര്‍ ജില്ലാ ചൈല്‍ഡ് പ്രൊട്ടക്ഷന്‍ യൂനിറ്റ്, ചൈല്‍ഡ്‌ലൈന്‍, എക്‌സൈസ്, പൊലീസ് എന്നിവയെ ആരെങ്കിലും അറിയിക്കുക വഴി കുട്ടികളെ ലഹരിക്ക് അടിമയാക്കുന്ന സംവിധാനമില്ലാതാക്കും. ലഹരി ഉപയോഗിക്കുന്ന കുട്ടികളുടെ വിവരങ്ങള്‍, ഉറവിടം, ലഹരി വില്‍ക്കുന്ന കടകള്‍, ആളുകള്‍, സ്ഥലം എന്നിവയെക്കുറിച്ച് കുട്ടികള്‍ക്കും പൊതുജനങ്ങള്‍ക്കും രഹസ്യമായി 9446882775, 9447243009 റരുൗാുാ@ഴാമശഹ.രീാ എന്നിവ വഴി അറിയിക്കാം. വിവരങ്ങള്‍ നല്‍കുന്ന വ്യക്തിയുടെ പേര് വിവരങ്ങള്‍ രഹസ്യമായി സൂക്ഷിക്കും. വിദ്യാലയങ്ങളില്‍ ലഹരി വിരുദ്ധ ബോധവത്കരണ പരിപാടികള്‍ നടപ്പാക്കുന്നതിന്റെ ഭാഗമായുള്ള ലഹരിമുക്ത പദ്ധതിയുടെ ജില്ലാതല ഉദ്ഘാടനം മലപ്പുറം ഗവ. ബോയ്‌സ് ഹയര്‍ സെക്കന്‍ഡറി സ്‌കൂളില്‍ ജില്ലാ കലക്ടര്‍ എസ്. വെങ്കിടേശപതി നിര്‍വഹിച്ചു. സിവില്‍ എക്‌സൈസ് ഓഫീസര്‍ ബിജു ക്ലാസ് നല്‍കി. ബോധവത്കരണത്തിന്റെ ഭാഗമായി ചൈല്‍ഡ്‌ലൈന്‍ പപ്പറ്റ് ഷോ സംഘടിപ്പിച്ചു. ജില്ലാ ചൈല്‍ഡ് പ്രൊട്ടക്ഷന്‍ ഓഫീസര്‍ സമീര്‍ മച്ചിങ്ങല്‍, ഓഫീസര്‍ എ.കെ മുഹമ്മദ് സാലിഹ്, ചൈല്‍ഡ് വെല്‍ഫയര്‍ കമ്മറ്റി മെമ്പര്‍മാരായ എം. മണികണ്ഠന്‍, ഹാരിസ് പഞ്ചിളി, ജുവനൈല്‍ ജസ്റ്റിസ് ബോര്‍ഡ് മെമ്പര്‍ കെ.പി ഷാജി, സ്‌കൂള്‍ പ്രിന്‍സിപ്പല്‍ കെ.പി ബീന, ജില്ലാ ചൈല്‍ഡ് പ്രൊട്ടക്ഷന്‍ യൂനിറ്റിലെ ഉദ്യോഗസ്ഥന്മാരായ മുഹമ്മദ് ഫസല്‍, കെ.വി യാസര്‍, ഫസല്‍ പുള്ളാട്ട്, റൂബി രാജ്, സി.പി സലീം, അന്‍വര്‍ എന്നിവര്‍ പങ്കെടുത്തു.