മുള്ളേരിയ: വ്യാപാരിയെ ഭീഷണിപ്പെടുത്തി പണം തട്ടാന്‍ ശ്രമിച്ച സംഭവത്തില്‍ രണ്ടുപേര്‍ അറസ്റ്റില്‍. കര്‍ണാടക ബെല്‍ത്താങ്ങാടി സ്വദേശി അശോകന്‍ (35), മുള്ളേരിയക്കു സമീപം ബെള്ളിഗെയിലെ ശിവപ്രസാദ് (30) എന്നിവരാണ് അറസ്സിലായത്. മുള്ളേരിയയിലെ വ്യാപാരി രമാനന്ദ റാവുവിനെ ഫോണില്‍ വിളിച്ച് റാവുവിന്റെ നീലചിത്രമടങ്ങിയ സി.ഡി ഞങ്ങളുടെ കൈവശമുണ്ടെന്നും ഏഴു ലക്ഷം രൂപ തരണമെന്നും ഗാഡിഗുഡ്ഡെയിലെ ഒരു കടയില്‍ എത്തിക്കണമെന്നുമായിരുന്നു അജ്ഞാതര്‍ ഫോണില്‍ വിളിച്ചറിയിച്ചത്. ഇതില്‍ സംശയം തോന്നിയ വ്യാപാരി ആദൂര്‍ പൊലിസില്‍ പരാതി നല്‍കുകയയിരുന്നു. തുടര്‍ന്ന് ഫോണ്‍ നമ്പര്‍ കേന്ദ്രീകരിച്ച് നടത്തിയ അന്വേഷണത്തിലാണ് ഇരുവരെയും അറസ്റ്റ് ചെയ്തത്. അറസ്റ്റിലായ ശിവപ്രസാദ് വര്‍ഷങ്ങളോളം രമാനന്ദ റാവുവിന്റെ കടയിലെ ജീവനക്കാരനായിരുന്നു. ഈയിടെയായി മുള്ളേരിയയില്‍ ഡിന്നര്‍ സെറ്റ് കട നടത്തി വരുന്നു. അശോകന്‍ ശിവപ്രസാദിന്റെ ബന്ധുവാണെന്നും പണം തട്ടാനുള്ള ഉദ്ദേശം ഇരുവര്‍ക്കും ഉണ്ടായിരുന്നില്ലെന്നും തമാശയായി ഫോണ്‍ വിളിച്ചതെന്ന് അറസ്റ്റിലായവര്‍ മൊഴി നല്‍കിയതായും അറസ്റ്റിലായവര്‍ പറഞ്ഞതായി പൊലിസ് പറഞ്ഞു. ഇരുവരെയും റിമാന്റ് ചെയ്തു.