തിരുവനന്തപുരം: കോട്ടയം കാഞ്ഞിരപ്പളളി സെന്റ് ഡൊമിനിക്‌സ് കോളജിലെ രണ്ടാം വര്‍ഷ ബി.കോം വിദ്യാര്‍ഥിനിയും എരുമേലി മുക്കുട്ടുത്തറ കുന്നത്ത് ജെയിംസ് ജോസഫിന്റെ മകളുമായ ജെസ്‌ന മരിയ ജെയിംസിനെ കാണാതായ സംഭവത്തില്‍ അന്വേഷണം ഊര്‍ജിതപ്പെടുത്തണമെന്ന് വനിതാ കമ്മിഷന്‍ ആവശ്യപ്പെട്ടു.

ഇതിനായി ചുമതലപ്പെടുത്തിയിരിക്കുന്ന പ്രത്യേക അന്വേഷണ സംഘത്തിന്റെ അന്വേഷണം ത്വരിതപ്പെടുത്തണമെന്ന് ചെയര്‍പേഴ്‌സണ്‍ എം.സി. ജോസഫെയ്ന്‍ ഡി.ജി.പിയോട് ആവശ്യപ്പെട്ടു. സംഭവവുമായി ബന്ധപ്പെട്ട് കമ്മിഷന്‍ നേരത്തേ തന്നെ സ്വമേധയാ കേസെടുത്തിരുന്നു.

ചെയര്‍പേഴ്‌സന്റെ നിര്‍ദേശ പ്രകാരം ജില്ലാ പൊലിസ് മേധാവിയോട് അന്വേഷണ റിപ്പോര്‍ട്ടും ആവശ്യപ്പെട്ടിരുന്നു. എന്നാല്‍ ജെസ്‌നയെ ഇതു വരെ കണ്ടെത്താനാവാത്ത സാഹചര്യത്തിലാണ് നടപടി. കഴിഞ്ഞ മാര്‍ച്ച് 22 നാണ് ജെസ്‌നയെ കാണാതായത്.