കൊണ്ടോട്ടി: കരിപ്പൂര്‍ വിമാനത്താവളത്തിലെ അന്താരാഷ്ട്ര ടെര്‍മിനലില്‍ ബോംബ് കണ്ടെത്തിയ വാര്‍ത്ത യാത്രക്കാരെയും വിമാനത്താവള അധികൃതരെയും മുള്‍മുനയില്‍ നിര്‍ത്തി. വിമാനത്താവളത്തിലെ വിവിധ ഏജന്‍സികള്‍ ചേര്‍ന്ന് നടത്തിയ മോക് ഡ്രില്ലാണെന്ന് വ്യക്തമായതോടെയാണ് ഭീതി അകന്നത്. ഇന്നലെ ഉച്ചക്ക് 2.15 നാണ് ടെര്‍മിനലില്‍ നാടകീയ സംഭവങ്ങള്‍ അരങ്ങേറിയത്.
അന്താരാഷ്ട്ര ടെര്‍മിനലില്‍ അജ്ഞാതന്‍ ബോംബ് വച്ചതായുള്ള സന്ദേശം കണ്‍ട്രോള്‍ റൂമില്‍ ലഭിച്ചതോടെയാണ് മോക്ഡ്രില്ല് ആരംഭിച്ചത്. തുടര്‍ന്ന് വിമാനത്താവള ബോംബ് സ്‌ക്വാഡും ഡോഗ് സ്‌ക്വാഡും രംഗത്തെത്തി. മലപ്പുറത്ത് നിന്നു ബോംബ് സ്‌ക്വാഡും കരിപ്പൂരിലെത്തിയിരുന്നു. സുരക്ഷാ സേനയ്ക്കു പുറമെ സംസ്ഥാന പൊലിസും പരിശോധനക്ക് എത്തിയിരുന്നു.