വടക്കാഞ്ചേരി: ബോയ്‌സ് ഹൈസ്‌കൂള്‍ ഗ്രൗണ്ട് പുല്ലുകള്‍ വളര്‍ന്ന് കാട്ടുപൊന്തക്ക് സമാനമായി കിടക്കുമ്പോഴും അധികൃതര്‍ ഇങ്ങോട്ട് തിരിഞ്ഞ് നോക്കുന്നില്ലെന്ന് പരാതി. സംസ്ഥാനത്തെ തന്നെ ഏറ്റവും മികച്ച ഗ്രൗണ്ടുകളിലൊന്നായ ഈ കളി സ്ഥലത്തിന്റെ പരിചരണത്തില്‍ ഗുരുതരമായ വീഴ്ചയാണ് അധികൃതരുടെ ഭാഗത്ത് നിന്ന് ഉണ്ടാകുന്നതെന്ന പരാതി ഉയരാന്‍ തുടങ്ങിയിട്ട് നാളുകളേറെയായി.
ഗ്രൗണ്ടിന് സമീപം ഏതാനും സ്വകാര്യ വ്യക്തികള്‍ നടത്തുന്ന അനധികൃത പ്രവര്‍ത്തനങ്ങളും, സാധന സാമഗ്രികള്‍ സൂക്ഷിക്കുന്ന നടപടിയും കായികപ്രേമികള്‍ക്കും, താരങ്ങള്‍ക്കും ഭീഷണിയാകുന്നു. ഇന്നലെ പുലര്‍ച്ചെ ഗ്രൗണ്ടില്‍ പ്രഭാത സവാരിക്കിടെപരുത്തിപ്ര സ്വദേശി മുതുക്കാട്ടില്‍ ഹൈദര്‍ കോയക്ക് പാമ്പു കടിയേറ്റു. ഇദ്ദേഹം മുളങ്കന്നത്ത്കാവ് മെഡിക്കല്‍ കോളജ് ആശുപത്രിയില്‍ ചികിത്സയിലാണ്. നിരവധി കായിക താരങ്ങളാണ് പുലര്‍ച്ചെ ഗ്രൗണ്ടില്‍ പരിശീലനത്തിന് എത്തുന്നത്.ഗ്രൗണ്ട് വൃത്തിയാക്കാന്‍ അടിയന്തര നടപടി ഉണ്ടാകണമെന്നാണ് കായികപ്രേമികളുടെ ആവശ്യം.