തിരുവനന്തപുരം: ഡെപ്യൂട്ടി സ്പീക്കര്‍ സ്ഥാനത്തേക്കുള്ള തെരഞ്ഞെടുപ്പില്‍ എല്‍.ഡി.എഫിലെ വി ശശിക്ക് ജയം. 90 വോട്ടുകളാണ് വി ശശി നേടിയത്. യു.ഡി.എഫിലെ കോണ്‍ഗ്രസ് എം.എല്‍.എയായ ഐ.സി ബാലകൃഷ്ണന്‍ 45 വോട്ട് നേടി. പി.സി ജോര്‍ജ് വോട്ട് ചെയ്തു. കുടുംബ പരിപാടിയില്‍ പങ്കെടുക്കാനുള്ളതിനാല്‍ ഒ. രാജഗോപാല്‍ ഇന്ന് സഭയിലെത്തിയില്ല. രാവിലെ 9.30നാണ്  തെരഞ്ഞെടുപ്പ് ആരംഭിച്ചത്. രഹസ്യ ബാലറ്റിലൂടെയാണ് വോട്ടെടുപ്പ് നടന്നത്. ചിറയിന്‍കീഴ് മണ്ഡലത്തില്‍നിന്നുള്ള സി.പി.ഐ അംഗമാണ് വി.ശശി. പി.സി ജോര്‍ജ് ആര്‍ക്കാണ് വോട്ട് ചെയ്തതെന്ന് വ്യക്തമല്ല. സ്പീക്കര്‍ തെരഞ്ഞെടുപ്പില്‍ യു.ഡി.എഫിന്റെ ഒരു വോട്ട് എല്‍.ഡി.എഫിന് ലഭിച്ചിരുന്നു. ഒ. രാജഗോപാലും എല്‍.ഡി.എഫിനായിരുന്നു വോട്ട് ചെയ്തത്. ഇത്തവണ യു.ഡി.എഫിന്റെ വോട്ട് ചോര്‍ന്നിട്ടില്ല.