ചാവക്കാട്: തീരദേശത്ത് വിദ്യാര്‍ഥികള്‍ക്കും, മത്സ്യതൊഴിലാളികള്‍ക്കും കഞ്ചാവ് വില്‍ക്കുന്ന യുവാവിനെ എക്‌സൈസ് സംഘം അറസ്റ്റ് ചെയ്തു. അകലാട് കൊട്ടിലിങ്ങല്‍   നൗഷാദി(കണ്ണൂസ്-36) നെയാണ് വാടാനപ്പിള്ളി എക്‌സൈസ് സര്‍ക്കിള്‍ ഇന്‍സ്‌പെക്ടര്‍ കെ. പ്രദീപ്കുമാറിന്റെ നേതൃത്വത്തിലുള്ള സംഘം അറസ്റ്റ് ചെയ്തത്. അകലാട്, എടക്കഴിയൂര്‍, മൂന്നൈനി, നായാടി കോളനി എന്നിവിടങ്ങളില്‍ നടത്തിയ പരിശോധനയിലാണ് ഇയാള്‍ പിടിയിലായത്. ഇയാളുടെ പക്കല്‍ നിന്നും 100 ഗ്രാം കഞ്ചാവ് കണ്ടെടുത്തു. കഞ്ചാവ് പൊതികളിലാക്കി  ഒരു പൊതിക്ക് 500 രൂപ നിരക്കിലാണ് ഇയാള്‍ വില്‍പന നടത്തുന്നത്. വില്‍പനക്കിടെയാണ് ഇയാള്‍ പിടിയിലാവുന്നത്. പ്രതിയെ പിടികൂടിയ സംഘത്തില്‍ അസിസ്റ്റന്റ്  എക്‌സൈസ് ഇന്‍സ്‌പെക്ടര്‍  പി. പങ്കജാക്ഷന്‍,  പ്രിവന്റീവ് ഓഫിസര്‍  എം.ജി. അനൂപ്കുമാര്‍, പി.വി.ബെന്നി സിവില്‍ എക്‌സൈസ് ഓഫിസര്‍മാരായ കെ.വി.രാജേഷ്, ജെയ്‌സണ്‍.പി.ദേവസ്സി, പി.എ.വിനോജ്, ഇ.സി. സന്തോഷ്, ടി.ജെ.ജോജോ, വി. ജി. ഗിരീഷ്   എന്നിവരും ഉണ്ടായിരുന്നു.