പെരുമ്പാവൂര്‍: സംസ്ഥാനത്തിന്റെ വിവിധ പ്രദേശങ്ങളില്‍ കവര്‍ച്ച നടത്തിയ മോഷ്ടാക്കളെ പൊലീസ് പിടികൂടി.  പെരുമ്പാവൂര്‍ ഡി.വൈ.എസ്.പി കെ.എസ് സുദര്‍ശനന്റെ നേതൃത്വത്തിലുള്ള പ്രത്യേക പൊലീസ് സംഘമാണ് പ്രതികളെ അറസ്റ്റ് ചെയ്തത്. തമിഴ്‌നാട് തേനി ജില്ലയിലെ കാമാക്ഷിപുരം സ്വദേശികളായ സുന്ദരന്‍, വിഷ്ണുകുട്ടി എന്നീ വിളിപ്പേരുകളുള്ള കൃഷ്ണന്‍ (42), കൃഷ്ണന്റെ സഹോദരന്‍ പാണ്ഡ്യന്‍ എന്നുവിളിക്കുന്ന സന്തോഷ് പാണ്ഡ്യന്‍ (35), കാമാക്ഷിപുരം വടക്കേ തെരുവ് സ്വദേശി രാജേന്ദ്രന്‍ (58) എന്നിവരാണു പിടിയിലായത്.
    രണ്ടാഴ്ച മുമ്പ് പെരുമ്പാവൂര്‍ അല്ലപ്ര സ്വദേശി അജയ് വില്‍സന്റെ വീട്ടില്‍ നടന്ന മോഷണ ശ്രമത്തിനിടെ പ്രതികളുടെ ചിത്രങ്ങള്‍ വീട്ടിലെ സി.സി.ടി.വിയില്‍ പതിഞ്ഞിരുന്നു. ഈ ദൃശ്യങ്ങളാണു വഴിത്തിരിവായത്.
തൊട്ടടുത്ത ദിവസം തടിയിട്ടപറമ്പ് പൊലീസ് സ്റ്റേഷന്‍ അതിര്‍ത്തിയില്‍ ഉറങ്ങിക്കിടന്ന സ്ത്രീയെ ആക്രമിച്ച് അഞ്ചര പവനോളം വരുന്ന ആഭരങ്ങളും 60000 രൂപയും മോഷ്ടിച്ച സംഭവത്തിലും പ്രതികളുടെ സി.സി.ടി.സി ദൃശ്യങ്ങള്‍ ലഭിച്ചിരുന്നു. സമീപകാലത്ത് ഇവര്‍ പെരുമ്പാവൂര്‍ മേഖലയിലെ വീടുകളുടെ പിന്‍വാതിലുകള്‍ പൊളിച്ച് നിരവധി മേഷണങ്ങള്‍ നടത്തുകയും വീട്ടിലുള്ളവരെ ആക്രമിക്കുകയും ചെയ്തതായി പൊലീസ് പറഞ്ഞു. പകല്‍സമയങ്ങളില്‍ കറങ്ങിനടന്ന് രാത്രികാലങ്ങളില്‍ മോഷണം നടത്തുകയായിരുന്നു പ്രതികളുടെ പതിവ്. മാരകായുധങ്ങളുമായാണ് പ്രതികള്‍ മോഷ്ടിക്കാന്‍ എത്തുന്നതെന്ന് പൊലീസ് പറഞ്ഞു. മോഷണ ശ്രമത്തിനിടെ വീട്ടുകാര്‍ ഉണര്‍ന്നാല്‍ അവരെ കൊലപ്പെടുത്താനുള്ള മനോഭാവവും പ്രതികള്‍ക്കുള്ളതായി പൊലീസ് വ്യക്തമാക്കി.
എറണാകുളം റൂറല്‍ ജില്ലാ പോലീസ് മേധാവി എ.വി ജോര്‍ജ്ജ് ഐ.പി.എസിന്റെ നിര്‍ദ്ദേശപ്രകാരം പൊലിസ് പ്രത്യേക സംഘം രൂപീകരിച്ച് അന്വേഷണം ആരംഭിക്കുകയായിരുന്നു. എട്ട് വര്‍ഷത്തോളമായി നിരവധി കളവ് കേസുകളില്‍ പിടികിട്ടാപുള്ളികളായി പ്രഖ്യാപിക്കപ്പെട്ട പ്രതികളെ കണ്ടെത്താന്‍ അന്വേഷണ സംഘത്തിന് ഒരുപാട് ബുദ്ധിമുട്ടി. പ്രതികളെ തേടി തമിഴ്‌നാട്ടിലെ തേനില്‍ എത്തിയ സംഘം ഒരാഴചയോളം അവിടെ താമസിച്ചാണ് പ്രതികളെ പിടികൂടിയത്.
പെരുമ്പാവൂര്‍ സര്‍ക്കിള്‍ ഇന്‍സ്‌പെക്ടര്‍ ബൈജു പൗലോസിന്റെയും സബ് ഇന്‍സ്‌പെക്ടര്‍ പി.എ ഫൈസലിന്റെയും ഷാഡോ എ.എസ്.ഐ കെ.എ ജോയിയുടെയും നേതൃത്വത്തില്‍ എ.എസ്.ഐ ശാമ്, സീനിയര്‍ സിവില്‍ പോലീസുകാരായ രാജേന്ദ്രന്‍, ദിലീപ് കുമാര്‍, അനൂപ്. ഷാഡോ പോലീസ് എ.എസ്.ഐ മാരായ കെ.എ ജോയി, സജീവ് ചന്ദ്രന്‍, സീനിയര്‍ സിവില്‍ പോലീസ് ഓഫീസര്‍മാരായ രാജേഷ്, ശാംകുമാര്‍, മനോജ്, അഖില്‍, മുഹമ്മദ്, രഞ്ജിത്ത് എന്നിവര്‍ ഉള്‍പ്പെടുന്ന പൊലീസ് സംഘമാണ് പ്രതികളെ  പിടികൂടിയത്.