തിരുവനന്തപുരം: കേരളത്തിലുള്ള ഇതരസംസ്ഥാന തൊഴിലാളികളുടെ ഡാറ്റാബാങ്ക് തയാറാക്കുമെന്ന് തൊഴില്‍ മന്ത്രി ടി.പി.രാമകൃഷ്ണന്‍ നിയമസഭയെ അറിയിച്ചു. ജയിംസ് മാത്യു എം.എല്‍.എയുടെ ശ്രദ്ധക്ഷണിക്കലിന് മറുപടി പറയുകയായിരുന്നു അദ്ദേഹം. ഇവരുടെ താമസത്തിനായി പാലക്കാട് ആരംഭിച്ച അപനാ ഘര്‍ പദ്ധതി സംസ്ഥാന വ്യാപകമാക്കും. ഏതാണ്ട് 25 ലക്ഷത്തിലധികം ഇതരസംസ്ഥാന തൊഴിലാളികള്‍ കേരളത്തിലുണ്ടെന്നാണ് ഗുലാത്തി ഇന്‍സ്റ്റിറ്റ്യൂട്ടിന്റെ പഠനത്തില്‍ വ്യക്തമാക്കുന്നത്. എന്നാല്‍, സര്‍ക്കാരിന്റെ കുടിയേറ്റ ക്ഷേമനിധിയില്‍ അംഗങ്ങളായത് 53,316 പേര്‍ മാത്രമാണ്. തദ്ദേശ സ്വയംഭരണ സ്ഥാപനങ്ങളുടെ സഹായത്തോടെ ഇതരസംസ്ഥാന തൊഴിലാളികളുടെ കണക്കെടുക്കുമെന്നും അദ്ദേഹം പറഞ്ഞു.