പാലാ: ബാങ്ക് ഇടപാടുകള്‍ പൂര്‍ണ്ണമായും സര്‍ക്കാര്‍ നിയന്ത്രണത്തിലാക്കണമെന്നും നിയമാനുസൃതമായ ഫീസുകള്‍ മാത്രം വാങ്ങുന്നുവെന്ന് ഉറപ്പാക്കണമെന്നും പാലാ പൗരാവകാശ സമിതി സര്‍ക്കാരിനോട് ആവശ്യപ്പെട്ടു. ന്യൂജനറേഷന്‍ ബാങ്കുകളില്‍ 8000 രൂപയും, നാഷണലൈസ്ഡ് ബാങ്കുകളില്‍ 1000 മുതല്‍ 5000 രൂപ വരെയും മിനിമം ബാലന്‍സ് വേണ്ടയിടത്ത് പോസ്റ്റോഫിസുകളില്‍ എസ്.ബി. അക്കൗണ്ടുകള്‍ക്ക് 50 രൂപ മാത്രമാണുള്ളത്. ഒരിക്കല്‍ പോലും ഉപയോഗിക്കാത്ത എ.ടി.എം. കാര്‍ഡുകള്‍ക്കും കൂടാതെ പല പേരുകളിലായി വിവിധ ഫീസുകള്‍ക്കു പുറമെ സര്‍വ്വീസ് ചാര്‍ജ്ജും സേവന നികുതിയും വാങ്ങി വായ്പാക്കാരുടെയും ജനങ്ങളുടെയും ഗതികേടിനെ വന്‍ചൂഷണം ചെയ്യുകയാണ് ബാങ്കുകാര്‍. പോസ്റ്റോഫിസുകളുടെ പ്രവര്‍ത്തനങ്ങളെക്കുറിച്ച് സന്ദേശം ജനങ്ങളില്‍ എത്തിക്കുവാന്‍ പ്രചരണ പരിപാടി നടത്തുവാനും 'നോട്ട് നിരോധനത്തിന്റെ ഗുണദോഷങ്ങളും ബാങ്കിങ്് മേഖലയിലെ ചൂഷണവും' എന്ന വിഷയത്തില്‍ പാലാ പൗരാവകാശ സമിതി നടത്തിയ സെമിനാറില്‍ തീരുമാനിച്ചു. എസ്.ബി.ഐ. മുന്‍ ഓഫിസര്‍ അലക്‌സ് മേനാംപറമ്പില്‍ ഉദ്ഘാടനം ചെയ്ത സെമിനാറില്‍ അഡ്വ. സിറിയക് ജയിംസ് അധ്യക്ഷത വഹിച്ചു. ജോയി കളരിക്കല്‍, ടോമി അഞ്ചേരില്‍, ടി.കെ. ശശിധരന്‍ സംസാരിച്ചു.