പീരുമേട്: എക്‌സൈസിനെ വെട്ടിച്ചു കടന്ന സംഘത്തിന്റെ വാഹനം അപകടത്തില്‍ പെട്ടു. വാഹന യാത്രികരായ മൂന്നു പേരെ എക്‌സൈസ് സംഘം പിടികൂടി. മാനന്തവാടി സ്വദേശികളാണ് വാഹനത്തിലുണ്ടായിരുന്നത്. ദേശീയപാത 183ല്‍ പാമ്പനാറിനു സമീപം മൂക്കറുത്താന്‍ വളവിലാണ് ഇവരുടെ ജീപ്പ് അപകടത്തില്‍ പെട്ടത്. ഇന്നലെ വൈകുന്നേരം അഞ്ചരയോടെ തമിഴ്‌നാട്ടില്‍ നിന്നുമെത്തിയ ജീപ്പ് കുമളിയിലെ അതിര്‍ത്തി ചെക്ക് പോസ്റ്റില്‍ എക്‌സൈസ് ഉദ്യോഗസ്ഥര്‍  നിര്‍ത്താനാവശ്യപ്പെട്ടെങ്കിലും  നിര്‍ത്താതെ കടന്നു പോവുകയായിരുന്നു. പാമ്പനാറിനു സമീപത്ത് അമിതവേഗത്തില്‍ കൊടും വളവിലെത്തി നിയന്ത്രണം വിട്ട ജീപ്പ് റോഡരികിലെ ഓടയിലേക്ക് പതിക്കുകയായിരുന്നു. അപകട സമയത്ത് െ്രെഡവര്‍ മാത്രമാണ് വണ്ടിയിലുണ്ടായിരുന്നത്. വണ്ടിയിലുണ്ടായിരുന്നവര്‍ വഴിയിലിറങ്ങിയതായി െ്രെഡവര്‍ പറഞ്ഞതിനെ തുടര്‍ന്ന് നടത്തിയ തിരച്ചിലില്‍ നാലു കിലോമീറ്റര്‍ പിന്നില്‍ നിന്നും നാലുപേരെ കൂടി കണ്ടെത്തി. ഇവര്‍ ലഹരി വസ്തുക്കള്‍ വഴിയില്‍ ഉപേക്ഷിച്ചതായി സംശയിച്ച് ഇതിനായുള്ള തിരച്ചില്‍ നടന്നുവരുകയാണ്.