ചെറുവത്തൂര്‍: നിപ വൈറസ് ആശങ്കയുയര്‍ത്തുന്നതിനിടയില്‍ വാട്‌സ്ആപ്പില്‍ വ്യാജപ്രചാരണം. നിപ വൈറസ് മൂലം പനി ബാധിച്ച് ചെറുവത്തൂര്‍ സ്വദേശി മംഗളൂരുവില്‍ ചികിത്സയിലാണെന്ന വ്യാജ സന്ദേശമാണ് സമൂഹമാധ്യമങ്ങളില്‍ പ്രചരിച്ചത്.
ഇന്നലെ രാവിലെ എട്ടോടെയാണ് ചില വാട്‌സാപ്പ് ഗ്രൂപ്പുകളില്‍ സന്ദേശം വന്നുതുടങ്ങിയത്. അധികം വൈകാതെ ഇതു വ്യാപകമായി പ്രചരിച്ചു. ചെറുവത്തൂര്‍ സ്വദേശി മനോഹരന്‍ നിപ വൈറസ് ബാധയെ തുടര്‍ന്ന് മംഗളൂരു കെ.എം.സി ആശുപത്രിയില്‍ ചികിത്സയില്‍ എന്നായിരുന്നു സന്ദേശം. ആശങ്ക പരന്നതോടെ വി.വി സ്മാരക സാമൂഹ്യാരോഗ്യ കേന്ദ്രത്തിലേക്ക് അന്വേഷണങ്ങളുടെ പ്രവാഹമായി. നിരവധി പേര്‍ നേരിട്ടും വിവരമറിയാന്‍ എത്തി. ഇതോടെ പനി ബാധിച്ചു ഏതെങ്കിലും മനോഹരന്‍ മംഗളൂരുവില്‍ ചികിത്സയിലുണ്ടോ എന്നും ആശാ വര്‍ക്കര്‍മാരുടെ സഹായത്തോടെ അന്വേഷിച്ചു. ഡോ. പ്രവീണ്‍കുമാറും ആശുപത്രിയിലെ മറ്റു ജീവനക്കാരും മംഗളൂരുവിലെ എല്ലാ സ്വകാര്യ ആശുപത്രികളിലും അന്വേഷണം നടത്തി. കര്‍ണാടക സ്വദേശിയായ മനോഹര നായ്ക് അല്ലാതെ മറ്റൊരു മനോഹരനും ചികിത്സയില്‍ ഇല്ലെന്ന വിവരമാണ് അവിടെനിന്നു ലഭിച്ചത്. ഇയാള്‍ മറ്റൊരു അസുഖത്തിനാണ് ചികിത്സ തേടുന്നതെന്നും വ്യക്തമായതോടെ പ്രചരിക്കുന്ന സന്ദേശം വ്യാജമാണെന്നു വ്യക്തമായി.
ജില്ലയില്‍ നിപ്പാ വൈറസ് ഒരാള്‍ക്കും ബാധിച്ചിട്ടില്ലെന്ന് ഡി.എം.ഒ എ.പി ദിനേശ് കുമാര്‍ അറിയിച്ചു.