കരുനാഗപ്പള്ളി: മത്സ്യമാര്‍ക്കറ്റില്‍ നിന്നും വാങ്ങിയ സ്രാവ് കറിവച്ചു കഴിച്ച എട്ടോളം പേര്‍ക്ക് തലക്കറക്കവും ഛര്‍ദ്ദിയും അനുഭവപ്പെട്ടു. മുല്ലശ്ശേരിമുക്കിന് തെക്ക് തഴവ സൂര്യചന്ദനം വീട്ടില്‍ അനില്‍കുമാറി(47)നും കുടുംബത്തിനുമാണ് മീന്‍ കഴിച്ചത് ദുരിതമായത്. കഴിഞ്ഞ തിങ്കളാഴ്ച പുതിയകാവ് മത്സ്യമാര്‍ക്കറ്റില്‍ നിന്നും വാങ്ങിയ സ്രാവാണ് കറിവച്ചത്. ഇതിന്റെ മുറിച്ചെടുത്ത ഒരു ഭാഗം കുടുംബവീട്ടില്‍ കൊടുക്കുകയും ചെയ്തു. ഉച്ചയൂണ് കഴിച്ച് രണ്ട് മണിക്കൂര്‍ പിന്നിട്ടപ്പോഴേക്കും മകള്‍ ദേവീചന്ദന(12)ക്ക് ഛര്‍ദ്ദിലും തലക്കറക്കവും അനുഭവപ്പെട്ടതിനെ തുടര്‍ന്ന് സമീപത്തെ സ്വകാര്യ ആശുപത്രിയില്‍ പ്രവേശിച്ചു. രാത്രിയോടെ അനില്‍കുമാറിനെയും ഭാര്യയെയും സമാനമായ അസ്വസ്ഥതയെത്തുടര്‍ന്ന് ആശുപത്രിയില്‍ പ്രവേശിപ്പിച്ചു. ഇക്കാര്യങ്ങള്‍ ഒന്നും അറിയാതെ കുടുംബവീട്ടുകാര്‍ പിറ്റേദിവസം മീന്‍കറി കൂട്ടിയതോടെ അവര്‍ക്കും ഇതേ അസുഖം ഉണ്ടാവുകയായിരുന്നു. മീന്‍ കേടാകാതെ സൂക്ഷിക്കാന്‍ ചേര്‍ത്ത മാരകമായ രാസപദാര്‍ത്ഥം വരുത്തിയ വിഷബാധയായിരുന്നു കാരണം. ഇതിനുശേഷം ഇവരുടെ കൈയുടെയും മുഖത്തിന്റെയും പുറംതൊലി ഇളകി മാറുകയാണ്. മത്സ്യമാര്‍ക്കറ്റുകളിലും മറ്റും ഭക്ഷ്യ സുരക്ഷാവിഭാഗവും ആരോഗ്യ വകുപ്പ് അധികൃതരും യഥാസമയം പരിശോധന നടത്തുന്നില്ലെന്ന പരാതിക്ക് അടിവരയിടുന്ന സംഭവങ്ങളാണ് ഉണ്ടാകുന്നത്.