മലപ്പുറം: കാസര്‍കോട് ചൂരിയിലെ പള്ളിയില്‍ റിയാസ് മുസ്‌ലിയാരുടെ കൊലപാതകത്തില്‍ പ്രതിഷേധിച്ച് ഇന്നു മലപ്പുറത്ത് പ്രതിഷേധ പ്രകടനം നടത്താന്‍ സുന്നി യുവജന സംഘം ജില്ലാ കമ്മിറ്റി തീരുമാനിച്ചു. ശാന്തിയുടെ കേന്ദ്രമായ ആരാധനാലയത്തില്‍ ഉറങ്ങിക്കിടക്കുന്ന മുഅല്ലിമിനെ അര്‍ധരാത്രിയില്‍ ക്രൂരമായി അറുകൊല ചെയ്ത സംഭവത്തില്‍ ശക്തമായ പ്രതിഷേധം രേഖപ്പെടുത്തുന്നതിനായി റാലിയില്‍ ആയിരങ്ങള്‍ അണിനിരക്കും.
ഫാസിസം ആരാധനനലായത്തിലേക്കു കടന്നുകയറുന്നതിലുള്ള പ്രതിഷേധം പ്രകടമാക്കുന്നതായിരിക്കും റാലി. മുസ്‌ലിമിന്റെ മയ്യിത്ത് എട്ടു വര്‍ഷം ജോലി ചെയ്ത സ്ഥലത്ത് കൊണ്ടുവന്നു നിസ്‌കരിക്കുന്നതിന് അനുമതി നിഷേധിച്ച പൊലിസ് നയത്തിനെതിരേ റാലി താക്കീതാകും. പ്രതികളെ കണ്ടെത്തി മാതൃകാപരമായ ശിക്ഷ നല്‍കേണ്ടത് അനിവാര്യമാണെന്നു സയ്യിദ് അബ്ബാസലി ശിഹാബ് തങ്ങളുടെ അധ്യക്ഷതയില്‍ ചേര്‍ന്ന യോഗം ചൂണ്ടിക്കാട്ടി. വൈകിട്ട് നാലിനു കുന്നുമ്മല്‍ കലക്ടര്‍ ബംഗ്ലാവിനു പരിസരത്തുനിന്നു തുടങ്ങുന്ന റാലി സുന്നി മഹല്‍ പരിസരത്ത് സമാപിക്കും. എസ്.വൈ.എസ് ജില്ലാ പ്രവര്‍ത്തക സമിതി അംഗങ്ങളും ജില്ലയിലെ ആമില പ്രവര്‍ത്തകരും നാലിന് എത്തിച്ചേരണം.