ജിദ്ദ മദീനയില്‍നിന്ന് 141 യാത്രക്കാരുമായി ബംഗ്ലാദേശിലെ ധാക്കയിലേക്ക് പോവുകയായിരുന്ന സഊദിയ വിമാനം ജിദ്ദ എയര്‍പോര്‍ട്ടില്‍ അടിയന്തരമായി ഇറക്കിയത് ഹൈഡ്രോളിക് സംവിധാനത്തില്‍ സാങ്കേതിക തകരാറുണ്ടായതിനെ തുടര്‍ന്ന്.

പൈലറ്റിന്റെ മനഃസാന്നിധ്യവും മിടുക്കുമാണ് 141 യാത്രക്കാരുടെയും പത്തു ജീവനക്കാരുടെയും ജീവന്‍ രക്ഷിച്ചത്. തിങ്കളാഴ്ച വൈകിട്ട് മദീനയില്‍ നിന്ന് പറന്നുയര്‍ന്ന് അല്‍പസമയം പിന്നിട്ട ശേഷം രാത്രി എട്ടോടെയാണ് 'എയര്‍ബസ് എ 330' ഇനത്തില്‍ പെട്ട വിമാനത്തിന്റെ ഹൈഡ്രോളിക് സംവിധാനത്തില്‍ സാങ്കേതിക തകരാറുണ്ടായത് പൈലറ്റിന്റെ ശ്രദ്ധയില്‍ പെട്ടതെന്ന് സഊദിയ വക്താവ് എന്‍ജിനീയര്‍ അബ്ദുറഹ്മാന്‍ അല്‍ത്വയ്യിബ് പറഞ്ഞു. ഇതോടെ ജിദ്ദ വിമാനത്താവളത്തിലേക്ക് വിമാനം തിരിച്ചുവിടുകയായിരുന്നു.

എന്നാല്‍ ജിദ്ദയില്‍ ലാന്റ് ചെയ്യാന്‍ നേരത്ത് വിമാനത്തിന്റെ മുന്‍വശത്തെ ടയറുകള്‍ താഴേക്ക് വന്നില്ല. പലതവണ ശ്രമിച്ചിട്ടും ഈ പ്രശ്‌നം പരിഹരിക്കാനായില്ല. അവസാനം എല്ലാവിധ മുന്‍കരുതലുകളും സ്വീകരിച്ച്, മുന്‍വശത്തെ ടയറുകള്‍ ഇല്ലാതെ തന്നെ വിമാനം ലാന്റ് ചെയ്യാന്‍ തീരുമാനിക്കുകയായിരുന്നു.

സുരക്ഷിതമായി ഇറക്കിയ വിമാനത്തിലെ 141 യാത്രക്കാരെയും 10 ജീവനക്കാരെയും എമര്‍ജന്‍സി കവാടങ്ങള്‍ വഴി പുറത്തിറക്കി. പൈലറ്റിന്റെ ഉയര്‍ന്ന വൈഭവവും ജിദ്ദ എയര്‍പോര്‍ട്ടിലെ ബന്ധപ്പെട്ട എല്ലാ വകുപ്പുകളും ഏകോപനത്തോടെയും സഹകരണത്തോടെയും പ്രവര്‍ത്തിച്ചതിന്റെ ഫലമായുമാണ് വിമാനം വിജയകരമായി ഇറക്കാന്‍ സാധിച്ചതെന്ന് എന്‍ജിനീയര്‍ അബ്ദുറഹ്മാന്‍ അല്‍ത്വയ്യിബ് പറഞ്ഞു.

ഏതു അടിയന്തര സാഹചര്യവും നേരിടുന്നതിന് ജിദ്ദ എയര്‍പോര്‍ട്ടില്‍ എല്ലാവിധ ഒരുക്കങ്ങളും നടത്തിയിരുന്നു. മുന്‍വശത്തെ ടയറുകള്‍ ഇല്ലാതെ വിമാനം സുരക്ഷിതമായി ലാന്റ് ചെയ്യാനായതോടെയാണ് ഭീതിയൊഴിഞ്ഞത്. എഴുപതു യാത്രക്കാര്‍ക്ക് ആരോഗ്യ മന്ത്രാലയത്തിനു കീഴിലെ ഡോക്ടര്‍മാരും നഴ്‌സുമാരും ചേര്‍ന്ന് സംഭവ സ്ഥലത്തു പ്രാഥമിക ശുശ്രൂഷകള്‍ നല്‍കി. നാലു പേരെ എയര്‍പോര്‍ട്ട് ഹെല്‍ത്ത് സെന്ററിലേക്ക് മാറ്റി. സംഭവത്തില്‍ അന്വേഷണം തുടങ്ങി. അന്വേഷണം പൂര്‍ത്തിയായ ശേഷം വിശദമായ റിപ്പോര്‍ട്ട് പുറത്തിറക്കുമെന്നും ബന്ധപ്പെട്ടവര്‍ അറിയിച്ചു.