മഞ്ചേരി: ഹജ് എംബാര്‍ക്കേഷന്‍ കോഴിക്കോട് നിന്നാക്കാന്‍ ശ്രമം തുടരുമെന്ന് സംസ്ഥാന ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞി മൗലവി പറഞ്ഞു. മഞ്ചേരി ടൗണ്‍ഹാളില്‍ നടന്ന ഹാജിമാര്‍ക്കുള്ള സാങ്കേതിക പഠനക്ലാസിന്റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം.
സംസ്ഥാന ഹജ്ജ് കമ്മറ്റിയും എം.പിമാരും അതിനുള്ള ശ്രമം നടത്തിവരുന്നുണ്ട്. ഹജ്ജിന്റെ വേളകളില്‍ പുണ്യഭൂമിയിലെത്തുന്നവര്‍ നടത്തുന്ന പ്രാര്‍ഥനകളില്‍ രാജ്യത്തേയും സമുദായത്തേയും ഉള്‍പ്പെടുത്തണമെന്നും യാത്രകളില്‍ ക്ഷമ കൈവിടാതെ നോക്കണമെന്നും അദേഹം ഓര്‍മിപ്പിച്ചു. ടി.കെ അബ്ദുറഹിമാന്‍ അധ്യക്ഷനായി.
എന്‍.പി ഷാജഹാന്‍ ക്ലാസെടുത്തു. ഡോ. ഇ.കെ അഹമ്മദ്കുട്ടി, ശരീഫ് മണിയാട്ടകുട്ടി, കെ.ടി അബ്ദുറഹ്മാന്‍, ഇ.സി മുഹമ്മദ്, സലീം എടക്കര, കണ്ണിയന്‍ മുഹമ്മദാലി, ടി.പി അഹമദ് സലീം, ഒ.ടി മുസ്തഫ ഫൈസി, അബ്ദുറശീദ് സംസാരിച്ചു.