വഴിക്കടവ്: വഴിക്കടവ് പൊലിസ് സ്‌റ്റേഷന്റെ സുരക്ഷാ പ്രവൃത്തികള്‍ പൂര്‍ത്തിയാക്കി. നിലവില്‍ മാവോയിസ്റ്റ് ഭീഷണി നേരിടുന്ന ജില്ലയിലെ സ്റ്റേഷനുകളില്‍ പ്രധാനമാണ് വഴിക്കടവ്. ജില്ലയില്‍ എവിടെ നിന്ന് മാവോയിസ്റ്റുകളെ പിടികൂടിയാലും വഴിക്കടവ് സ്‌റ്റേഷനാണ് കസ്റ്റഡിയില്‍ വാങ്ങുന്നത്.
സ്റ്റേഷനില്‍ പരിമിതമായ സുരക്ഷാ സംവിധാനങ്ങളാണ് ഉണ്ടായിരുന്നത്. പുതിയ രീതിയില്‍ ഉള്ള സുരക്ഷ സംവിധാനം നിലവില്‍ ജില്ലയില്‍ വഴിക്കടവില്‍ മാത്രമാണുള്ളത്. മാവോയിസ്റ്റ് ഭീഷണിയും, മാവോയിസ്റ്റ് സാന്നിധ്യവും നിലമ്പൂര്‍ മേഖലയില്‍ സ്ഥിരീകരിച്ചത് കണക്കിലെടുത്താണ് സ്‌റ്റേഷന് സുരക്ഷ ഒരുക്കിയിരിക്കുന്നത്. അഞ്ച് മീറ്റര്‍ ഉയരത്തില്‍ സ്റ്റേഷന് ചുറ്റുമതില്‍ നിര്‍മിച്ചു ഇതിന് മുകളിലായി പെന്‍സിങ്ങുണ്ട്. ഇരുവശങ്ങളിലായി നിരീക്ഷണ ഗോപുരങ്ങളും ഗാര്‍ഡ് റൂമുകളും നിര്‍മിച്ചിരിക്കുന്നു.
സ്റ്റേഷന് പരിസരവും പകലും രാത്രിയിലും ആന്റി നക്‌സല്‍ സ്വകാഡിന്റെ നിരീക്ഷണത്തിലാണ്. രാത്രിയില്‍ കാവല്‍ ശക്തമാക്കിയിട്ടുണ്ട്. സ്റ്റേഷന് മുന്‍പിലായി വാഹനങ്ങള്‍ നിര്‍ത്തുന്നത് വിലക്കിയിട്ടുണ്ട്. സ്റ്റേഷന്റെ സുരക്ഷ വര്‍ധിപ്പിക്കുന്നതിനായി 56 ലക്ഷം രൂപയോളം വിനിയോഗിച്ചിട്ടുണ്ട്. ജില്ലയില്‍ മവോയിസ്റ്റ് ഭീഷണിയുള്ള എടക്കര , പൂക്കോട്ടുംപാടം, പോത്ത് കല്ല് സ്റ്റേഷനിലുകളും സുരക്ഷ ഈ രീതിയില്‍ വര്‍ധിപ്പിക്കുമെന്നാണ് കണക്കാക്കുന്നത്. എന്നാല്‍ സ്വന്തമായി സ്ഥലമില്ലാത്തത് ഫണ്ട് അനുവദിക്കുന്നതിന് വിലങ്ങു തടിയാകുന്നുണ്ട്.