കുട്ടനാട്: പ്രിയ ഗുരുവിന് കുരുന്നുകളുടെ ഗാനാജ്ഞലി. കാവാലം താളത്തില്‍ ചൊല്ലിപഠിപ്പിച്ച പാട്ടുകള്‍ കുരുന്നുകൂട്ടം പാടിയപ്പോള്‍ കലാസ്വദകുടെ ഹൃദയം പിടച്ചു. കാവാലത്തിന്റെ കൈയൊപ്പായ കുരുന്നു കൂട്ടം കളരിയിലെ കുട്ടികളായിരുന്നു ചിതയ്ക്ക് മുന്നില്‍ കാവാലത്തിന്റെ ചിത്രം നെഞ്ചിലേറ്റി പാടിയത്. കളരിയിലെ നാല്‍പ്പത് കുട്ടികള്‍ കാവാലത്തിന്റെ പ്രിയ ഗാനങ്ങള്‍ ഓരോന്നായി ഇടമുറിയാതെ താളത്തില്‍ പാടിയപ്പോള്‍ അത് തങ്ങളെ നെഞ്ചിലേറ്റിയ ആചാര്യനുള്ള അശ്രൂ പൂജയായി മാറി.അരങ്ങൊഴിഞ്ഞ നാടകാചാര്യന് കാവാലത്തിന് മണ്ണില്‍ വിടനല്‍കാന്‍ എത്തിയവര്‍ക്കെല്ലാം കുരുന്നുകളുടെ വിഷാദ ഗാനം നൊമ്പരം സൃഷ്ടിച്ചു. ഹൃദയം നൊന്തു പാടിയ കുട്ടികള്‍ക്ക് ഗുരുനാഥന് ഇതിലും വലിയ ഗുരുദക്ഷിണ നല്‍കാന്‍ കഴിയുമായിരുന്നില്ല.