എരുമപ്പെട്ടി: വെള്ളറക്കാട് കൊല്ലംപടിയില്‍ ടിപ്പര്‍ലോറി ബൈക്കിലിടിച്ച് വിദ്യാര്‍ഥികള്‍ക്ക് പരുക്കേറ്റു. ഇന്നലെ രാവിലെ 9 മണിയോടെയാണ് അപകടം നടന്നത്. സ്‌കൂള്‍ സമയ നിയന്ത്രണം പാലിക്കാതെ ഓടിച്ചുവന്നിരുന്ന ടിപ്പര്‍ ലോറി ഇടിച്ചാണ് അപകടം സംഭവിച്ചിട്ടുള്ളത്. ക്രഷറുകളില്‍ നിന്നും കരിങ്കല്‍ പൊടി കയറ്റി വന്നിരുന്ന ടിപ്പര്‍ ലോറി പൊലിസിന്റെ ശ്രദ്ധയില്‍ പെടാതിരിക്കാന്‍ കൊല്ലംപടിയിലെ ഇടവഴിയിലൂടെയാണ് വന്നിരുന്നത്. പ്രദേശത്തെ പ്രധാന റോഡുകളിലെല്ലാം പൊലിസ് ചെക്കിംഗ് നടക്കുന്നതിനാലാണ് ലോറിഡ്രൈവര്‍മാര്‍ ഊടുവഴികള്‍ തിരഞ്ഞെടുക്കുന്നത്. കുന്നംകുളത്ത് നിന്നും വരികയായിരുന്ന വിദ്യാര്‍ഥികള്‍ സഞ്ചരിച്ചിരുന്ന ബൈക്കില്‍ അശ്രദ്ധയോടെ കയറിവന്ന ടിപ്പര്‍ ലോറി ഇടിക്കുകയായിരുന്നു.അപകടത്തില്‍ പരുക്കേറ്റ രണ്ട് വിദ്യാര്‍ഥികളെ കുന്നംകുളത്തുള്ള റോയല്‍ ആശുപത്രിയില്‍ പ്രവേശിപ്പിച്ചു. പ്രദേശത്ത് സ്‌കൂള്‍ സമയങ്ങളില്‍ ടിപ്പര്‍ ലോറികളുടെ അമിതസഞ്ചാരം നാട്ടുകാര്‍ക്കിടയില്‍ പ്രതിഷേധത്തിനിടയാക്കിയിട്ടുണ്ട്.