കണ്ണൂര്‍: ന്യൂമാഹിയിലെ ബി.ജെ.പി പ്രവര്‍ത്തകനായ ഷമേജിന്റെ കൊലപാതകവുമായി ബന്ധപ്പെട്ട് മൂന്നുപേര്‍ കൂടി അറസ്റ്റില്‍. ന്യൂമാഹി സ്വദേശികളായ മുഹമ്മദ് ഫൈസല്‍, ഷാജി എന്നു വിളിക്കുന്ന സജീഷ്, കെ.കെ രഗില്‍ എന്നിവരെയാണ് തലശ്ശേരി സി.ഐ പ്രേമചന്ദ്രന്റെ നേതൃത്വത്തിലുള്ള പൊലിസ് സംഘം അറസ്റ്റുചെയ്തത്. ഇതോടെ കേസില്‍ ആറുപേര്‍ അറസ്റ്റിലായിക്കഴിഞ്ഞു. മൂന്നുപേരും കൊലപാതകത്തില്‍ നേരിട്ട് പങ്കെടുത്തിട്ടുണ്ടെന്നാണ് പൊലിസ് സംശയിക്കുന്നത്. അഞ്ചുദിവസം മുമ്പ് വടകരയിലെ ഒരു ലോഡ്ജില്‍ വച്ച് മൂന്നുപേര്‍ പിടിയിലായിരുന്നു. ഷെബിന്‍ രവീന്ദ്രന്‍, വിജിന്‍ ചന്ദ്രന്‍, എം.എം ഷാജി എന്നിവരെയാണ് പൊലിസ് അറസ്റ്റുചെയ്തത്. മാഹി പള്ളൂരിലെ സി.പി.എം പ്രവര്‍ത്തകനായ കണ്ണിപ്പൊയില്‍ ബാബുവിന്റെ കൊലപാതകത്തിനു പിന്നാലെയാണ് ബി.ജെ.പി ബൂത്ത് പ്രസിഡന്റായ ഷമേജിനെ ഒരു സംഘം ഓട്ടോ തടഞ്ഞ് വെട്ടിക്കൊന്നത്. ആറുപേര്‍ ചേര്‍ന്നാണ് കൊല നടത്തിയതെന്ന് പൊലിസ് നേരത്തെ കണ്ടെത്തിയിരുന്നു.