അങ്ങാടിപ്പുറം: കോട്ടപ്പറമ്പ് സ്‌കൂളിനു സമീപത്തെ വീട്ടില്‍ മോഷണശ്രമം. ബുധനാഴ്ച രാത്രിയോടെ വീടിന്റെ ഓട് പൊളിച്ച് അകത്തുകടന്ന കള്ളന്‍ വീട്ടിനുള്ളില്‍ തിരച്ചില്‍ നടത്തുന്നതിനിടെ വീട്ടമ്മയാണ് കള്ളനെ കണ്ടത്.
വീട്ടമ്മ ഒച്ചത്തില്‍ നിലവിളിച്ചതോടെ കള്ളന്‍ ഓടി രക്ഷപ്പെടുകയായിരുന്നു. ഓടുപ്പൊളിച്ച് അകത്തുകയറിയ മോഷ്ടാവ് അകത്തു നിന്നു വാതിലിന്റെ കതക് തുറന്നിട്ട ശേഷമായിരുന്നു മോഷണശ്രമം നടത്തിയത്. വീട്ടില്‍ ഭര്‍തൃമാതാവും രണ്ട് കുട്ടികളും ഗര്‍ഭിണിയായ വീട്ടമ്മയുമാണ് വീട്ടില്‍ ഉണ്ടായിരുന്നത്. ഇതെല്ലാം മനസിലാക്കിയ ശേഷമാണ് മോഷ്ടാവ് മോഷണം നടത്താന്‍ ശ്രമിച്ചതെന്നും സംശയമുണ്ട്.
മാസങ്ങള്‍ക്ക് മുമ്പ് സമീപത്തെ മറ്റൊരു വീട്ടിലെ തുറന്നിട്ട ജനാല്‍ വഴി ഉറങ്ങിക്കിടക്കുകയായിരുന്ന യുവതിയുടെ കാലിലും കൈയിലും തപ്പി സ്വര്‍ണാഭരണങ്ങള്‍ മോഷ്ടിക്കാന്‍ ശ്രമിച്ചതായും റിപ്പോര്‍ട്ടുകളുണ്ടായിരുന്നു.