തലശ്ശേരി: എട്ടുവയസുകാരിയെ ലൈംഗികമായി പീഡിപ്പിച്ച കേസിലെ പ്രതിക്കു 10 വര്‍ഷം കഠിനതടവും 25,000 രൂപ പിഴയും. ആറളം പൂളക്കുറ്റി വെള്ളറക്കോളനിയിലെ നിടുംമ്പ്രംചാല്‍ പ്രദീപനെ(35) ആണ് അഡീഷനല്‍ ജില്ലാ സെഷന്‍സ് കോടതി (ഒന്ന്) ജഡ്ജി പി.എന്‍ വിനോദ് ശിക്ഷിച്ചത്. പോക്‌സോ നിയമപ്രകാരം ഏഴുവര്‍ഷം കഠിനതടവും 25,000 രൂപ പിഴയുമാണ് ശിക്ഷ. കൂടാതെ ജുവനൈല്‍ ആക്ട് 75 പ്രകാരം പ്രതി മൂന്നുവര്‍ഷം കഠിനതടവ് അനുഭവിക്കണമെന്നും കോടതി ഉത്തരവിട്ടു. പ്രതി പിഴയടക്കുകയാണെങ്കില്‍ പീഡനത്തിനരയായ കുട്ടിയുടെ പേരില്‍ ദേശസാല്‍കൃത ബാങ്കില്‍ നിക്ഷേപിച്ച് കുട്ടിക്കു പ്രായപൂര്‍ത്തിയായാല്‍ നല്‍കണമെന്നും വിധിന്യായത്തില്‍ ചൂണ്ടിക്കാട്ടി. പിഴയടച്ചില്ലെങ്കില്‍ മൂന്നുമാസം അധികതടവ് അനുഭവിക്കണം. 2016 ജൂലൈ 27നായിരുന്നു സംഭവം. ഇരിട്ടി പുന്നപ്പാലത്തെ ബന്ധുവീട്ടില്‍ വച്ച് പ്രതി പീഡിപ്പിച്ചെന്ന് കുട്ടിയുടെ മാതാവ് ആറളം പൊലിസില്‍ പരാതി നല്‍കുകയായിരുന്നു.