തിരുവനന്തപുരം: ഹെല്‍മെറ്റ് ധരിക്കാതെ ഇരുചക്ര വാഹനമോടിക്കുന്നവര്‍ക്ക് പെട്രോള്‍ നല്‍കരുതെന്ന് പമ്പുടമകള്‍ക്ക് നിര്‍ദേശം നല്‍കിയതായി ട്രാന്‍സ്‌പോര്‍ട്ട് കമ്മീഷണര്‍ ടോമിന്‍ തച്ചങ്കരി. ഹെല്‍മെറ്റ് ധരിക്കാതെ തിരുവനന്തപുരം, കൊച്ചി, കോഴിക്കോട് നഗരത്തിങ്ങളിലെത്തുന്നവരാണ് കുടുങ്ങുക. നിര്‍ദേശം പമ്പുടമകള്‍ അംഗീകരിച്ചുവെന്നും ആഗസ്റ്റ് ഒന്നുമുതല്‍ പ്രാബല്യത്തില്‍ വരുമെന്നും തച്ചങ്കരി വാര്‍ത്താസമ്മേളനത്തില്‍ പറഞ്ഞു.

നിയമം കര്‍ശനമായി നടപ്പാക്കാന്‍ വകുപ്പ് ഉദ്യോഗസ്ഥര്‍ക്ക് നിര്‍ദേശം നല്‍കിയിട്ടുണ്ട്. ഹെല്‍മറ്റില്ലാതെ യാത്ര ചെയ്യുന്നവര്‍ക്കെതിരെ കര്‍ശന നടപടിയെടുക്കുമെന്നും തച്ചങ്കരി വ്യക്തമാക്കി.

അതേസമയം, കമ്മിഷണറുടെ തീരുമാനം അപ്രായോഗികമെങ്കില്‍ പുന:പരിശോധിക്കുമെന്ന് ഗതാഗത മന്ത്രി എ.കെ ശശീന്ദ്രന്‍ പറഞ്ഞു.