ചവറ: കൊറ്റന്‍കുളങ്ങര ദേവീക്ഷേത്രത്തിലെ പ്രസിദ്ധമായ പുരുഷാംഗനമാരുടെ ചമയവിളക്കെടുപ്പ് ഇന്ന് സമാപിക്കും. ഇതരസംസ്ഥാനങ്ങളില്‍ നിന്ന് പോലും നിരവധി പേരാണ് ഇവിടെ വിളക്ക് എടുക്കാന്‍ എത്തുന്നത്. ഇന്നലെയായിരുന്നു ചമയ വിളക്ക് മഹോല്‍സവം ആരംഭിച്ചത്. പുരുഷാംഗനമാര്‍ അണിഞ്ഞൊരുങ്ങി ക്ഷേത്രത്തിലെത്തി ശ്രീകോവിലിന് മുന്നില്‍ നിന്ന് വിളക്ക് കത്തിച്ച് പ്രദക്ഷിണം വച്ചതിന് ശേഷം വിളക്ക് മണ്ണില്‍ നാട്ടി ദേവിയുടെ അനുഗ്രഹത്തിനായി കാത്തിരിക്കുന്നതാണ് ആചാരം. പുരുഷന്‍മാര്‍ സ്ത്രീകളായി അണിഞ്ഞൊരുങ്ങി വിളക്കെടുക്കുന്ന കൊറ്റന്‍കുളങ്ങരയിലെ ചമയ വിളക്ക് കാണാനും വിളക്കെടുക്കാനും ദുര ദേശത്ത് നിന്നു പോലും ആളുകള്‍ എത്താറുണ്ട്. ചമയവിളക്ക് മഹോല്‍സവത്തിന്ന് ഇന്ന് അര്‍ധരാത്രിയോടെ സമാപനമാകും.