ധര്‍മശാല: ആസ്‌ത്രേലിയക്കെതിരേയുള്ള പരമ്പരയിലെ നാലാം ടെസ്റ്റില്‍ നിന്നും ക്യാപറ്റന്‍ കോഹ്‌ലി പുറത്ത്. തോളിനേറ്റ പരുക്കാണ് വില്ലനായിരിക്കുന്നത്. പകരം നാലാം ടെസ്റ്റില്‍ ഇന്ത്യയെ അജിങ്ക്യ രഹാനെ നയിക്കും. പരമ്പരയിലെ നിര്‍ണയാക മത്സരത്തില്‍ കോഹ്‌ലി കളിക്കാത്തത് ഇന്ത്യയെ സംബന്ധിച്ചിടത്തോളം നഷട്മാണെന്ന് രഹാനെ പറഞ്ഞു. എങ്കിലും മൂന്നാം ടെസ്റ്റില്‍ ഇന്ത്യന്‍ ബാറ്റിങ് നിര ഫോമിലേക്കുയര്‍ന്നത് പ്രതീക്ഷ നല്‍കുന്നതാണെന്നും അദ്ദേഹം പറഞ്ഞു.

ടോസ് നേടിയ ആസ്‌ത്രേലിയ ബാറ്റിങ് തെരഞ്ഞെടുത്തു. മികച്ച തുടക്കവുമായാണ് നാലാം ടെസ്റ്റിലെ ആദ്യ ദിനത്തില്‍ ഓസീസ്. ഒരു വിക്കറ്റ് നഷ്ടത്തില്‍ 130 റണ്‍സെടുത്തിരിക്കുകയാണ്. സ്‌കോര്‍ ബോര്‍ഡില്‍ 10 റണ്‍സ് ചേര്‍ക്കുമ്പോഴേക്കും ഓപ്പണര്‍ റെന്‍ഷോയെയാണ് ഓസീസിന് നഷ്ടപ്പെട്ടിരിക്കുന്നത്. റെന്‍ഷോയെ ഉമേഷ് യാദവ് ബൗള്‍ഡാക്കുകയായിരുന്നു. എന്നാല്‍, വാര്‍ണര്‍ക്ക് കൂട്ടായെത്തിയ ക്യാപ്റ്റന്‍ സ്മിത്തും വാര്‍ണറും വിക്കറ്റുകള്‍ നഷ്ടപ്പെടുത്താതെ സ്‌കോര്‍ ബോര്‍ഡ് മുന്നോട്ടു നീക്കി. ഓസീസിനു വേണ്ടി ക്രീസിലുള്ള സ്മിത്തും വാര്‍ണറും അര്‍ധസെഞ്ച്വറികള്‍ നേടി.

രണ്ട് മാറ്റങ്ങളോടെയാണ് നാലാം ടെസ്റ്റിന് ഇന്ത്യന്‍ ടീം ഇറങ്ങുന്നത്. പുതുമുഖം കൂല്‍ദീപ്യാദവും ഭുവനേശ്വര്‍ കുമാറും ടീമിലിടം പിടിച്ചു. ബൗളര്‍ ഇഷാന്ത് ശര്‍മയ്ക്ക് പകരമാണ് ഭുവനേശ്വര്‍ കുമാര്‍.