മലപ്പുറം: പ്ലസ്‌വണ്‍ ഏകജാലകരീതിയിലൂടെ മെറിറ്റ് ക്വാട്ടയില്‍ പ്രവേശനംനേടിയ വിദ്യാര്‍ഥികള്‍ക്കു കോംപിനേഷന്‍ മാറ്റത്തിനും സ്‌കൂള്‍ മാറ്റത്തിനും കോംപിനേഷന്‍ മാറ്റത്തോടുകൂടിയ സ്‌കൂള്‍ മാറ്റത്തിനും അപേക്ഷിക്കാന്‍ അവസരം. ആദ്യഘട്ട സ്‌കൂള്‍ കോംപിനേഷന്‍ മാറ്റങ്ങള്‍ക്കു നിലവിലുള്ള ഒഴിവുകളുടെ വിശദാംശങ്ങള്‍ ഇന്നുച്ചയ്ക്ക് ഒന്നിന് അഡ്മിഷന്‍ വെബ്‌സൈറ്റില്‍ പ്രസിദ്ധീകരിക്കും.

ജൂലൈ നാലിന് ഉച്ചക്കു രണ്ടുവരെയാണ് അപേക്ഷിക്കാനുള്ള സമയം. ഇപ്പോള്‍ പ്രവേശനം ലഭിച്ച സ്‌കൂളുകളിലെ പ്രിന്‍സിപ്പലിനാണ് അപേക്ഷ സമര്‍പ്പിക്കേണ്ടത്. സ്‌കൂള്‍ മാറ്റം അതേജില്ലയിലെ മറ്റൊരു സ്‌കൂളിലേയ്ക്കു മാത്രമേ അനുവദിക്കൂ. ഒന്നിലധികം സ്‌കൂളുകളിലേയ്ക്കും കോംപിനേഷനുകളിലേയ്ക്കും മാറ്റത്തിനായി ഒപ്ഷനുകള്‍ നല്‍കാവുന്നതാണ്. മുന്‍ഗണനാക്രമത്തിലാണ് ഓപ്ഷന്‍ നല്‍കേണ്ടത്. മാറ്റമാഗ്രഹിക്കുന്ന ഏതൊരു സ്‌കൂളിലേയ്ക്കും നിലവില്‍ ഒഴിവുകളില്ലെങ്കിലും അപേക്ഷ നല്‍കാവുന്നതാണ്.

മുഖ്യഘട്ടത്തില്‍ ഒന്നാം ഓപ്ഷന്‍ പ്രകാരം പ്രവേശനം നേടിയവര്‍ക്കു സ്‌കൂള്‍ കോംപിനേഷന്‍ മാറ്റത്തിനായി അപേക്ഷിക്കാന്‍ അവസരമില്ല. സ്‌പോര്‍ട്‌സ്, മാനേജ്‌മെന്റ്്, കമ്മ്യൂനിറ്റി ക്വാട്ടകളില്‍ പ്രവേശനം നേടിയവര്‍ക്കും മെറിറ്റ് സീറ്റുകളിലേയ്ക്കു സ്‌കൂള്‍ മാറ്റമോ കോംപിനേഷന്‍ മാറ്റമോ അനുവദിക്കില്ല. മാറ്റം അനുവദിച്ചശേഷം നിലവിലുള്ള ഒഴിവുകളുടെ വിശദാംശങ്ങള്‍ ജൂലൈ എട്ടിനു വെബ്‌സൈറ്റില്‍ പ്രസിദ്ധീകരിക്കും. പുതിയ അപേക്ഷ പരിഗണിക്കുന്നതോടൊപ്പം നേരത്തെ അപേക്ഷ നല്‍കിയിട്ടും അലോട്ട്‌മെന്റ് ലഭിക്കാത്തവര്‍ക്കും അലോട്ട്‌മെന്റ് ലഭിച്ചിട്ടും പ്രവേശനംനേടാന്‍ കഴിയാത്തവര്‍ക്കും അപേക്ഷ പുതുക്കി നല്‍കാം. നിലവിലുള്ള ഒഴിവുകളുടെ അടിസ്ഥാനത്തില്‍ ഓപ്ഷനുകളും പുതുക്കി നല്‍കാം.