കാസര്‍കോട്: പോസ്റ്റല്‍ ജീവനക്കാരുടെ സമരം മൂന്നു ദിവസം പിന്നിട്ടതോടെ തപാല്‍ ഉരുപ്പടികള്‍ കെട്ടിക്കിടക്കുന്നു. രണ്ടു ദിവസം മുമ്പാണ് വിവിധ ആവശ്യങ്ങള്‍ ഉന്നയിച്ചു തപാല്‍ ജീവനക്കാര്‍ സമരം തുടങ്ങിയത്. ഇതേ തുടര്‍ന്ന് ജില്ലയിലെ പോസ്റ്റ് ഓഫിസുകളില്‍ ആയിരക്കണക്കിന് തപാല്‍ ഉരുപ്പടികള്‍ കെട്ടിക്കിടക്കുകയാണ്. വിവിധ വിദ്യാഭ്യാസ സ്ഥാപനങ്ങളിലേക്കും മറ്റുമായി നിത്യേന ആയിരക്കണക്കിന് ഉരുപ്പടികള്‍ തപാല്‍ മുഖേന ആളുകള്‍ അയക്കുന്ന സമയത്താണ് തപാല്‍ ജീവനക്കാര്‍ സമരം തുടങ്ങിയത്.
ഈ വര്‍ഷം ഹജ്ജിനു പോകുന്ന ആളുകള്‍ രണ്ടാം ഗഡു പണമടച്ച രസീത് സ്പീഡ് പോസ്റ്റ് അയക്കാന്‍ ചെന്നതോടെയാണ് പലര്‍ക്കും തപാല്‍ ജീവനക്കാരുടെ സമര വിവരം അറിയാന്‍ സാധിച്ചത്. ഇതേ തുടര്‍ന്ന് പലരും കൊറിയര്‍ സര്‍വിസുകളെ ആശ്രയിക്കുകയായിരുന്നു.
എന്നാല്‍ മുന്‍ കാലങ്ങളിലെ പോലെ കൊറിയര്‍ സര്‍വിസുകാര്‍ ഉരുപ്പടികള്‍ ട്രെയിനില്‍ കൊണ്ട് പോകുന്നില്ല. ഇതേ തുടര്‍ന്ന് തൊട്ടടുത്ത ജില്ലകളില്‍ പോലും ഉരുപ്പടികള്‍ വിതരണം ചെയ്യുന്നത് രണ്ടിലേറെ ദിവസമെടുത്താണ്.
തപാല്‍ ജീവനക്കാരുടെ സമരം ഇനിയും നീളുകയാണെങ്കില്‍ ആളുകളുടെ ദുരിതം വീണ്ടും വര്‍ധിക്കും.