ജിദ്ദ: സഊദിയില്‍ സന്ദര്‍ശക വിസയില്‍ വിദേശ വനിതകള്‍ക്ക് കാലാവധിയുള്ള വിദേശ ലൈസന്‍സുണ്ടെങ്കില്‍ വാഹനങ്ങള്‍ ഓടിക്കാന്‍ അനുമതി നല്‍കുമെന്ന് ഗതാഗത മന്ത്രാലയ വൃത്തങ്ങള്‍ അറിയിച്ചുു. ഒരു വര്‍ഷം വരെയാണ് വിദേശ ലൈസന്‍സുകളില്‍ ഇവര്‍ക്ക് രാജ്യത്ത് കാറോടിക്കാന്‍ അനുമതിയുണ്ടാവുക.

സഊദി അംഗീകരിക്കുന്ന വിദേശ, അന്താരാഷ്ട്ര ലൈസന്‍സുകളായിരിക്കണമെന്ന് വ്യവസ്ഥയുണ്ട്. വനിതകള്‍ക്ക് ഇതുവരെ ഡ്രൈവിംഗ് ലൈസന്‍സ് അനുവദിച്ചിട്ടില്ലെന്ന് ട്രാഫിക് ഡയറക്ടറേറ്റ് അധികൃതര്‍ പറഞ്ഞു. ഡ്രൈവിംഗ് ലൈസന്‍സിനുള്ള ഓണ്‍ലൈന്‍ രജിസ്‌ട്രേഷനാണ് ഇപ്പോള്‍ നടക്കുന്നത്. അമേരിക്കന്‍, യൂറോപ്യന്‍, ഗള്‍ഫ് ഡ്രൈവിംഗ് ലൈസന്‍സുള്ള വനിതകള്‍ക്ക് ഡ്രൈവിംഗ് ടെസ്റ്റ് ബാധകമായിരിക്കും. ജൂണ്‍ 24 മുതലാണ് ഡ്രൈവിംഗ് ലൈസന്‍സിനുള്ള ടെസ്റ്റ് ആരംഭിക്കുക. ടെസ്റ്റില്‍ പാസാകുന്നവര്‍ക്ക് ലൈസന്‍സ് അനുവദിക്കും. അന്നു തന്നെ അവര്‍ക്ക് വാഹനമോടിക്കാന്‍ സാധിക്കും.

ഡ്രൈവിംഗ് ലൈസന്‍സില്ലാത്തവര്‍ക്ക് പരിശീലനം നിര്‍ബന്ധമാണ്. ഇതേക്കുറിച്ച് പിന്നീട് അറിയിക്കും. ജൂണ്‍ 24 മുതല്‍ ഡ്രൈവിംഗ് പരിശീലനം ആരംഭിക്കുമെന്നും ട്രാഫിക് ഡയറക്ടറേറ്റ് വൃത്തങ്ങള്‍ പറഞ്ഞു. വനിതകള്‍ക്കുള്ള ഡ്രൈവിംഗ് അനുമതി പ്രാബല്യത്തില്‍ വരുത്തുന്നതിനുള്ള മുഴുവന്‍ തയാറെടുപ്പുകളും ട്രാഫിക് ഡയറക്ടറേറ്റ് പൂര്‍ത്തിയാക്കിയതായി അധികൃതര്‍ അറിയിച്ചു.