കോഴിക്കോട്: ഇന്ത്യന്‍ മെഡിക്കല്‍ അസോസിയേഷന്‍ (ഐ.എം.എ) ഏര്‍പ്പെടുത്തിയ ബെസ്റ്റ് ഡോക്ടര്‍ അവാര്‍ഡ് പ്രഖ്യാപിച്ചു. കോഴിക്കോട് മെഡിക്കല്‍ കോളജിലെ ഗൈനക്കോളജി വിഭാഗത്തിലെ മുന്‍ പ്രൊഫസറും ഡിപ്പാര്‍ട്ട്‌മെന്റ് തലവനുമായിരുന്ന പി.കെ ശേഖരന്‍, കോംട്രസ്റ്റ് ഐ ആശുപത്രിയിലെ ലൈല മോഹന്‍, ഐ.എം.എയുടെ മുന്‍ പ്രസിഡന്റും അനസ്‌തേഷ്യാ വിഭാഗം കണ്‍സള്‍ട്ടന്റുമായ എം.ജി വിജയകുമാര്‍ എന്നിവര്‍ക്കാണ് അവാര്‍ഡ്.
ഐ.എം.സി സ്ഥാപക നേതാവ് ഡോ. ബി.സി റോയിയുടെ ജന്മദിനവും ഡോക്ടേഴ്‌സ് ഡേയുമായ നാളെ അവാര്‍ഡുകള്‍ വിതരണം ചെയ്യുമെന്നു ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു. വൈകിട്ട് എട്ടിന് ഐ.എം.എ ഹാളില്‍ നടക്കുന്ന ചടങ്ങ് മേയര്‍ തോട്ടത്തില്‍ രവീന്ദ്രന്‍ ഉദ്ഘാടനം ചെയ്യും. മെഡിക്കല്‍ കോളജിലെ ഗൈനക്കോളജി വിഭാഗത്തിലെ മികച്ച പി.ജി വിദ്യാര്‍ഥികള്‍ക്കുള്ള ഡോ. കെ.എം ലക്ഷ്മിഅമ്മ മെമ്മോറിയല്‍ ഐ.എം.എ ഗോള്‍ഡ് മെഡല്‍ ഡോ. എച്ച്. അനുഷ്‌കയ്ക്കും കാന്‍സര്‍ രോഗികള്‍ക്കായി ഏര്‍പ്പെടുത്തിയ ഏറാംപള്ളി കാരായ് വിജയറാം മെമ്മോറിയല്‍ എന്‍ഡോവ്‌മെന്റും ചടങ്ങില്‍ വിതരണം ചെയ്യും.
വാര്‍ത്താ സമ്മേളനത്തില്‍ ഐ.എം.എ പ്രസിഡന്റ് ഡോ. കെ.വി രാജു, ഡോ. അജിത്ഭാസ്‌കര്‍, എ.എസ് ശശിധരന്‍ പങ്കെടുത്തു.