ലണ്ടന്‍: ഇംഗ്ലണ്ടിനെതിരായ ഒന്നാം ക്രിക്കറ്റ് ടെസ്റ്റില്‍ പാകിസ്താന് ലീഡ്. ഇംഗ്ലണ്ടിന്റെ ഒന്നാം ഇന്നിങ്‌സ് 184 റണ്‍സില്‍ അവസാനിപ്പിച്ച് ഒന്നാം ഇന്നിങ്‌സ് തുടങ്ങിയ പാകിസ്താന്‍ രണ്ടാം ദിനം കളി നിര്‍ത്തുമ്പോള്‍ എട്ട് വിക്കറ്റ് നഷ്ടത്തില്‍ 350 റണ്‍സ് എന്ന നിലയില്‍. മൂന്ന് വിക്കറ്റുകള്‍ ശേഷിക്കേ പാകിസ്താന് 166 റണ്‍സ് ലീഡ്.
അര്‍ധ സെഞ്ച്വറികള്‍ നേടിയ ബാബര്‍ അസം (68), അസാദ് ഷഫീഖ് (59), ഷദബ് ഖാന്‍ (52), അസ്ഹര്‍ അലി (50) എന്നിവരുടെ ബാറ്റിങ് മികവിലാണ് പാക് മുന്നേറ്റം. ഇംഗ്ലണ്ടിനായി ബെന്‍ സ്റ്റോക്‌സ്, ജെയിംസ് ആന്‍ഡേഴ്‌സന്‍ എന്നിവര്‍ മൂന്ന് വീതം വിക്കറ്റുകള്‍ വീഴ്ത്തി. കളി നിര്‍ത്തുമ്പോള്‍ 19 റണ്‍സുമായി മുഹമ്മദ് ആമിറും റണ്‍സൊന്നുമെടുക്കാതെ മുഹമ്മദ് അബ്ബാസുമാണ് ക്രീസില്‍.
നേരത്തെ ടോസ് നേടി ഇംഗ്ലണ്ട് ബാറ്റിങിനിറങ്ങുകയായിരുന്നു. എന്നാല്‍ പാക് ബൗളിങിന് മുന്നില്‍ ഇംഗ്ലണ്ട് ബാറ്റിങ് നിര തകര്‍ന്നടിഞ്ഞു. 70 റണ്‍സുമായി മുന്‍ ക്യാപ്റ്റന്‍ അലിസ്റ്റര്‍ കുക്ക് ഏകനായി പൊരുതി. മധ്യനിരയില്‍ ബെന്‍ സ്റ്റോക്‌സ് 38 റണ്‍സെടുത്തു. നാല് വീതം വിക്കറ്റുകള്‍ വീഴ്ത്തിയ മുഹമ്മദ് അബ്ബാസ്, ഹസന്‍ അലി എന്നിവരുടെ ബൗളിങാണ് ഇംഗ്ലണ്ടിനെ തകര്‍ത്തത്.