ചെങ്ങന്നൂര്‍: ആര്‍.എസ്.എസിന്റെ വോട്ട് വേണ്ടായെന്ന് പറയാന്‍ കെ.പി.സി.സി പ്രസിഡന്റ് എം.എം.ഹസന് കഴിയാത്തതെന്തുകൊണ്ടെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍. ചെങ്ങന്നൂരില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
രമേശ് ചെന്നിത്തല ആര്‍.എസ്.എസ് വോട്ട് വേണ്ടായെന്ന് പറയുന്നു. ഇക്കാര്യത്തില്‍ കോണ്‍ഗ്രസിന് രണ്ട് അഭിപ്രായമാണ്. എ ഗ്രൂപ്പിന്റെ അഭിപ്രായം ആര്‍.എസ്.എസ്.വോട്ട് വേണമെന്നും ഐ ഗ്രൂപ്പിന്റെ അഭിപ്രായം വേണ്ടായെന്നുമാണ്. ഇതിലേതാണ് കോണ്‍ഗ്രസിന്റെ അഭിപ്രായം എന്ന് കോണ്‍ഗ്രസാണ് പറയേണ്ടതെന്ന് അദ്ദേഹം പറഞ്ഞു.
ബി.ജെ.പിക്കാരും വോട്ട് ചെയ്യണമെന്ന് എ.കെ.ആന്റണി പറഞ്ഞിരിക്കുകയാണ്.ബി.ജെ.പിക്കാര്‍ക്ക് കൂടി വോട്ട് ചെയ്യാന്‍ പറ്റിയ സ്ഥാനാര്‍ഥിയെ ഞങ്ങള്‍ നിര്‍ത്തിയിരിക്കുന്നു എന്ന് എ.കെ.ആന്റണി ഇന്നലെ പരസ്യമായി സമ്മതിച്ചു കഴിഞ്ഞതായും ബി.ജെ.പിക്കാര്‍ക്കും വോട്ട് ചെയ്യാം എന്ന നിലപാട് എടുത്തതിന്റെ പിന്നിലെ കാരണമെന്താണെന്നും കോടിയേരി ചോദിച്ചു.
മത നിരപേക്ഷ നിലപാട് സ്വീകരിക്കുന്ന പ്രസ്ഥാനമാണ് എ.ല്‍.ഡി.എഫ് ചെങ്ങന്നൂരിലെ എല്ലാ മതത്തിലും എല്ലാ ജാതിയിലുംപെട്ട ജനതയുടെ പിന്തുണ ഉള്ള പ്രസ്ഥാനമാണ് സി.പി.എം മതനിരപേക്ഷ നിലപാടാണ് സി.പി.എം ഉയര്‍ത്തിപ്പിടിക്കുന്നത്. എന്നാല്‍ കോണ്‍ഗ്രസ് അത്തരമൊരു നിലപാട് ഉയര്‍ത്തി പിടിക്കുന്നില്ല. അതാണ് ഞങ്ങളുടെ ആക്ഷേപം ആര്‍.എസ്.എസിന്റെ തീവ്രഹിന്ദുത്വം നേരിടാന്‍ മൃദു ഹിന്ദുത്വമാണ് കോണ്‍ഗ്രസ് സ്വീകരിക്കുന്നത്.
ഇത് തന്നെയാണ് കര്‍ണാടകത്തിലും കോണ്‍ഗ്രസ് സ്വീകരിച്ചത്. മതനിരപേക്ഷ കാഴ്ച്ചപ്പാടുള്ള ജനങ്ങളാണ് ഇവിടെ. ഹസനും കോണ്‍ഗ്രസും ഉയര്‍ത്തിവിടുന്ന പ്രചരണങ്ങളൊന്നും ചെങ്ങന്നൂര്‍ മണ്ഡലത്തില്‍ ചെലവാകാന്‍ പോകുന്നില്ലെന്നും കോടിയേരി പറഞ്ഞു.