മട്ടാഞ്ചേരി: ജലഗതാഗത വകുപ്പിന്റെ യാത്രബോട്ടില്‍ നിന്ന് കായലില്‍ ചാടിയ യുവതിയെ ബോട്ടിലെ ജീവനക്കാര്‍ സാഹസികമായി രക്ഷപ്പെടുത്തി.ഇന്നലെ ഉച്ചയ്ക്ക് രണ്ടരയോടെയാണ് സംഭവം.
ഫോര്‍ട്ട്‌കൊച്ചിയില്‍ നിന്ന് എറണാകുളത്തേക്ക് പോകുകയായിരുന്നു ജലഗതാഗത വകുപ്പിന്റെ എസ്.23 ബോട്ടില്‍ നിന്ന് പള്ളുരുത്തി നമ്പ്യാപുരം വലിയകത്ത് വീട്ടില്‍ ഷിനി റിയാസ്(30)ആണ് കായലിലേക്ക് ചാടിയത്. ഫോര്‍ട്ട്‌കൊച്ചിയില്‍ നിന്ന് ബോട്ട് വിട്ട് കപ്പല്‍ ചാലെത്തിയപ്പോള്‍ ഇവര്‍ പെട്ടെന്ന് കായലിലേക്ക് എടുത്ത് ചാടുകയായിരുന്നു.തുടര്‍ന്ന് ബോട്ടിലെ ലസ്‌ക്കര്‍മാരായ എന്‍.ഷാബു, മിഥുന്‍ സി നാഥ് എന്നിവര്‍ കായലില്‍ ചാടുകയും യുവതിയെ രക്ഷപ്പെടുത്തുകയുമായിരുന്നു.
സ്രാങ്ക് വി.എന്‍.കണ്ണന്‍,ഡ്രൈവര്‍ ആര്‍.നോബി എന്നിവര്‍ ബോട്ട് നിയന്ത്രിച്ച് രക്ഷാ പ്രവര്‍ത്തനത്തിന് ഇവരെ സഹായിച്ചു. തുടര്‍ന്ന് ബോട്ട് എറണാകുളത്ത് അടുപ്പിച്ച് എറണാകുളം ജനറല്‍ ആശുപത്രിയില്‍ യുവതിക്ക് പ്രാഥമിക ചികിത്സ നല്‍കി.