കരുനാഗപ്പള്ളി: തഴവയില്‍ അറവുമാലിന്യം തള്ളിയതിനെ തുടര്‍ന്ന് പൊറുതിമുട്ടിയ നാട്ടുകാര്‍ റോഡ് ഉപരോധിച്ചു പ്രതിഷേധിച്ചു. തഴവ എ.വി.എച്ച്.എസ്.എസ് കണ്ണമ്പള്ളി പടീറ്റതില്‍( തീപ്പുരമുക്ക്) റോഡില്‍ കഴിഞ്ഞ ദിവസം ആളൊഴിഞ്ഞ ഭാഗത്ത് അറവ് മാലിന്യങ്ങള്‍ ചാക്ക് കെട്ടുകളില്‍ നിറച്ച്‌കൊണ്ടാണ് തള്ളിയത്. കാറ്റടിച്ച് ദുര്‍ഗന്ധം പരന്നതിനെ തുടര്‍ന്നാണ് പരിസരവാസികള്‍ അറിയുന്നത്. വിവരം പഞ്ചായത്തിലും മറ്റും അറിയിച്ചുവെങ്കിലും ആരും എത്തിയില്ല. സ്ഥിരമായി ഇവിടങ്ങളില്‍ മാലിന്യം കൊണ്ട് തള്ളുന്നതില്‍ പ്രതിഷേധിച്ചു ജനങ്ങള്‍ സംഘടിക്കുകയായിരുന്നു.
പഞ്ചായത്തംഗം സലിം അമ്പീത്തറയില്‍, മുന്‍ പഞ്ചായത്ത് പ്രസിഡന്റ് ആര്‍ അമ്പിളി കുട്ടന്‍ തുടങ്ങിയവരുടെ നേതൃത്വത്തില്‍ കൂടുതല്‍ ആളുകള്‍ എത്തി റോഡ് ഉപരോധിക്കുകയായിരുന്നു. വിവരം അറിഞ്ഞ് പഞ്ചായത്ത് പ്രസിഡന്റ് എസ് ശ്രീലത, സെക്രട്ടറി തുടങ്ങിയവര്‍ സ്ഥലത്ത് എത്തുകയും തഴവ പഞ്ചായത്തിലുള്ള മുഴുവന്‍ ഇറച്ചിവെട്ടുകാരേയും വിളിപ്പിച്ച് നോട്ടീസ് കൊടുത്ത് നടപടിയെടുക്കാം എന്നുള്ള ഉറപ്പിന്‍മേല്‍ റോഡ് ഉപരോധം അവസാനിപ്പിക്കുകയുമായിരുന്നു. തഴവ മുണ്ടാലുംമൂട് പാലത്തിന് സമീപവും, പുത്തന്‍കുളത്തിലും ഏതാനം മാസങ്ങള്‍ക്ക് മുന്‍പ് ടാങ്കര്‍ ലോറികളില്‍ കക്കൂസ് മാലിന്യങ്ങള്‍ കൊണ്ട് തള്ളിയത് വന്‍വിവാദം ഉണ്ടാക്കിയിരുന്നു