പാലക്കാട്: പൊലിസ് കസ്റ്റഡിയില്‍ നിന്നും രക്ഷപ്പെട്ട പീഡനക്കേസ് പ്രതി പിടിയില്‍. അട്ടപ്പാടി പീഡനക്കേസിലെ പന്ത്രണ്ട് പ്രതികളില്‍ ഒരാളായ ആനക്കട്ടി സ്വദേശി വീനസ് രാജാണ് പിടിയിലായത്. ഇയാളെ മണ്ണാര്‍ക്കാട് പൂഞ്ചോലയിലെ ബന്ധുവീട്ടില്‍ നിന്നാണ് പിടികൂടിയത്.

കേസിലുള്‍പ്പെട്ട 12 പ്രതികളേയും റിമാന്‍ഡ് ചെയ്യാന്‍ കൊണ്ടുപോവുന്നതിനിടെയാണ് വീനസ് രാജ് പൊലിസ് വാനില്‍ നിന്ന് പൊലിസിന്റെ കണ്ണുവെട്ടിച്ച് രക്ഷപ്പെട്ടത്.

പെണ്‍കുട്ടിയെ കാണാതായതുമായി ബന്ധപ്പെട്ട കേസിലെ നാലു പ്രതികളെ മണ്ണാര്‍ക്കാട് മജിസ്‌ട്രേറ്റിന് മുന്‍പാകെ ഹാജരാക്കുന്നതിന് വേണ്ടി കൊണ്ടുപോവുകയും ബാക്കി എട്ട് പ്രതികളെ പൊലിസ് വാനില്‍ ഇരുത്തിയിരിക്കുകയുമായിരുന്നു. ഇതിനിടെയാണ് വീനസ് രാജ് ചാടി രക്ഷപ്പെട്ടത്.

മേയ് 19നാണ് അയല്‍ക്കാരിയായ യുവതി, പുതൂര്‍ ഉത്സവത്തിനെന്ന് പറഞ്ഞ് പെണ്‍കുട്ടിയെ ഒപ്പം കൊണ്ടുപോയത്. പെണ്‍കുട്ടി തിരിച്ചെത്താത്തതിനെത്തുടര്‍ന്ന് ബന്ധുക്കള്‍ പൊലിസില്‍ പരാതി നല്‍കി. മൂന്ന് ദിവസത്തെ അന്വേഷണത്തിനൊടുവിലാണ് പെണ്‍കുട്ടിയെ കണ്ടെത്തിയത്.